Qaraǵandy oblysynyń ákimi Ermaǵanbet Bólekbaev Saran qalasyndaǵy jylý berý máselesine qatysty pikir bildirdi, - dep habarlaidy Dalanews.kz Ulysmedia.kz-ke siltep.
SKK-de ótken brifingte Ulysmedia tilshisi ákimnen úkimette jaz mezgilinen bastap jylytý maýsymyna daiyndyq týraly aitylyp kele jatqanyn atap ótip, qalada mundai tótenshe jaǵdai qalai bolǵanyn túsindirýin surady.
Ákimniń aitýynsha, buǵan deiin Sarandaǵy qazandyqty "sýyq rejimde" tekserý múmkin bolmaǵan.
«Men sizderge tehnikalyq tilmen túsindirip kóreiin. Qazandyq salynǵan, ol tur. Qurylys aiaqtalǵan kezde sýyq rejimde tekserý júrgiziledi. Bul kezde qazandyq janbaidy, sýyq rejimde tekseriledi.
Tekserý kezinde bári durys bolyp kórindi. Odan keiin ony iske qosady. Jazda qosý qajet emes, óitkeni jazda jylý qajet emes. Sondyqtan ony qazan aiynda iske qosty», – dedi ákim.
Sondai-aq ol Sarandaǵy qazandyqta sorǵyǵa bailanysty másele týǵanyn, al jergilikti ákim JES baqylaýda dep esep bergenin jetkizdi.
«Men qazir ǵana másele sorǵylyq jabdyqqa qatysty bolǵanyn aittym. Másele qazandyqtarda emes, sorǵylarda boldy. Biz máseleni anyqtaǵansha, aqaý bolyp úlgerdi. Sol sebepti jergilikti qazandyqtarǵa aýystyrdyq. Qazir bizde jergilikti jáne ortalyq qazandyqtar jumys istep tur.
Qalanyń burynǵy ákimi osy jaǵdai úshin tikelei jaýapty. Jiyndarda jáne keńesterde bári durys, barlyǵy jumys istep tur dep únemi esep berilgen bolatyn», – dedi Bólekbaev.
Eske salaiyq,1 qarashada Prezident Qasym-Jomart Toqaev Qaraǵandy oblysynyń ákimi Ermaǵanbet Bólekbaevqa qatań sógis berdi.
Bul týraly Prezidenttiń keńesshisi – Prezidenttiń Baspasóz hatshysy Berik Ýáli habarlady.
"Memleket basshysy Qasym-Jomart Toqaev jylytý maýsymyna daiyndyq jumystaryna tiisinshe baqylaý jasamaǵany úshin Qaraǵandy oblysynyń ákimi Ermaǵanbet Bólekbaevqa sógis berdi", - dedi Berik Ýáli.
Aita keteiik, Ermaǵanbet Bólekbaev Qaraǵandy oblysyn 2022 jylǵy 8 jeltoqsannan bastap basqaryp kele jatyr. Ol oblysty basqarǵanǵa deiin Qaraǵandy qalasynyń ákimi bolǵan.
Eske salaiyq,premer Oljas Bektenov qazannyń ortasynda Sarandaǵy páterlerdiń jylytý maýsymyna daiyn emestigine kóńili tolmai, bul jaǵdai úshin jaýapty tulǵalardy jaýapkershilikke tartýǵa pármen bergen edi.
Bul onyń jergilikti atqarýshy bilikke baǵyttalǵan eleýli jáne qatqyl eskertýi edi. Bektenovtiń aitýynsha, bul másele qala ákimi men oblys basshylyǵynyń baqylaýynyń nasharlyǵynan týyndaǵan.
Jylytý maýsymyna daiyndyq týraly jalǵan málimet bergen árbir jaýapty adam tekserilip, zań júzinde jaýapkershilikke tartylatyny aldyn ala aitylǵan bolatyn. Dál osy jaǵdai jergilikti ákimder úshin jeke jaýapkershiliktiń qajettiligin aiqyndap otyr.
Keiin, 28 qazanda, Saran ákimine qatań eskertý jariialanǵan kezde, kópshilik Baýlyqovtyń tek sógispen qutylady dep paiymdaǵan edi.
Alaida, Úkimet basshysyna bul jaza jetkiliksiz bolyp kórindi.
Osylaisha 30 qazanda Saran ákimi Erkin Baýlyqov jylý berý maýsymynyń bastalýynda jibergen olqylyqtary úshin qyzmetinen bosatylǵan edi. Qazan aiynyń ortasynda qurylysy 10 jylǵa sozylyp, biyl salynyp bitken jańa ortalyq qazandyqtaǵy aqaýlarǵa bailanysty Sarandaǵy 168 úi jylýsyz qalǵan bolatyn.
"Qaraǵandy oblysy ákiminiń ókimimen Saran qalasynyń ákimi Erkin Baýlyqov qalada jylý berý maýsymynyń bastalýynda olqylyq jibergeni úshin atqaratyn qyzmetinen bosatyldy", - dep habarlady Qaraǵandy oblysynyń ákimdigi.
Ol bul qyzmetti bir jyldan astam ǵana ýaqyt atqardy.
Endi qala basshysy mindetin ýaqytsha osyǵan deiin Saran ákiminiń orynbasary bolǵan Maqsat Qaireshov atqaratyn boldy.
Saran turǵyndarynyń jylýsyz qalýyna qatysty Premer-ministrdiń birinshi orynbasary Roman Skliar da pikir bildirgen edi. Onyń sózinshe, Saran qalasynyń ákimdigi jańa qazandyqty iske qosý kezinde apat bolǵan jaǵdaida rezervtik qýattardy qarastyrmaǵan.
"Ákimdiktiń kinási olardyń qosalqy qazandyqty ázirlemegeninde. Respýblikalyq biýdjetten 9 mlrd teńge bólingen, jańa qazandyqty tamyz aiynda synap kórip, ol jumys istep ketedi dep senip qalǵan. Alaida rezervti saqtap otyrý kerek edi. Árine, mundaiǵa jol berýge bolmaidy", - dedi Skliar.
