Prezident Qasym-Jomart Toqaev «Samuryq-Qazyna» AQ basqarma tóraǵasy Nurlan Jaqypovty qabyldady, dep habarlaidy dalanews.kz.
Kezdesý barysynda Memleket basshysyna qordyń biylǵy bes aidaǵy jumysynyń qorytyndylary men aldaǵy kezeńge arnalǵan damý jospary tanystyryldy.
Nurlan Jaqypovtyń málimetinshe, 2025 jyldyń qorytyndysy boiynsha «Samuryq-Qazyna» aktivteriniń kólemi 88 mlrd dollarǵa jetken.
Sondai-aq qor aiasynda júzege asyrylyp jatqan iri infraqurylymdyq jáne ónerkásiptik jobalar týraly aqparat berildi. Biyl jalpy quny 3,3 trln teńgeni quraityn 16 jobany iske asyrý josparlanǵan.
Olardyń qatarynda Moiynty – Qyzyljar jáne Darbaza – Maqtaaral temirjol jelileriniń qurylysy, Qashaǵandaǵy gaz óńdeý zaýyty, Almatydaǵy ekinshi jylý elektr ortalyǵyn jańǵyrtý, gibridti elektr stantsiiasyn salý jáne Kaspii teńiziniń tabany arqyly talshyqty-optikalyq bailanys jelisin tartý jobalary bar.
Qor basshysy bul jobalar kólik, energetika jáne tsifrlyq infraqurylymdy damytýǵa, jańa jumys oryndaryn ashýǵa jáne halyqtyń ómir súrý sapasyn arttyrýǵa baǵyttalǵanyn aitty.
Kezdesýde áleýmettik bastamalar da sóz boldy. Jaqypovtyń aitýynsha, qor jobalary jyl saiyn shamamen 1 million qazaqstandyqty qamtidy.
Budan bólek, «Taza Qazaqstan» aktsiiasy aiasynda el boiynsha 5 million kóshet otyrǵyzý josparlanǵan. Al 2024–2025 jyldary 5,8 million aǵash egilgen.
Sondai-aq 2023–2026 jyldar aralyǵynda jalpy quny 856 mlrd teńgeden asatyn 100-den astam áleýmettik joba júzege asyrylǵany aityldy.
Kezdesýde tsifrlyq tehnologiialardy damytý máselesi de kóterildi. Nurlan Jaqypov biyl qazan aiynda Qosshy qalasynda NVIDIA B300 platformasy negizindegi jańa sýperkompiýter iske qosylatynyn málimdedi.
Onyń aitýynsha, jańa klaster paidalanýǵa berilgennen keiin «Qazaqtelekom» kompaniiasynyń esepteý qýaty tórt esege artady. Bul jasandy intellekt, derekterdi óńdeý jáne joǵary ónimdi esepteýler salasyndaǵy múmkindikterdi keńeitýge jol ashady.
Kezdesý qorytyndysynda Prezident Qasym-Jomart Toqaev qorǵa negizgi investitsiialyq jobalardy ýaqytyly ári sapaly iske asyrý boiynsha birqatar tapsyrma berdi.
