Memleket basshysy kórnekti jazýshy, dramatýrg Dýlat Isabekovtiń otbasy men jaqyn týystaryna kóńil aitý jedelhatyn joldady, dep habarlaidy Dalanews.kz.
Prezident Qasym-Jomart Toqaev kórnekti jazýshy, dramatýrg, Qazaqstannyń Eńbek Eri, Memlekettik syilyqtyń iegeri Dýlat Isabekovtiń dúnieden ótýine bailanysty onyń otbasy men jaqyn týystarynyń qaiǵysyna ortaqtasyp, kóńil aitty.
– Dýlat Isabekuly ulaǵatty ǵumyryn ult ádebietine arnaǵan, taǵylymdy týyndylarymen oqyrman sanasyna shamshyraq bola bilgen naǵyz degdar tulǵa edi.
Halqymyzdyń rýhani álemin baiytýda, ulttyq prozamyzdyń kókjiegin keńeitýde aianbai ter tógip, ónegeli ómir súrdi. Qýatty qalamynan týǵan súbeli shyǵarmalary, dramalyq eńbekteri álem sahnalaryn baǵyndyryp, dúnie júzine kieli sóz ónerimizdi dáriptedi.
Sońyna ádebi mol mura qaldyrǵan Dýlat Isabekulynyń jarqyn beinesi men ardaqty esimi halqymyzdyń júreginde máńgi saqtalady. Marqumnyń imany salamat, jany jánnatta bolsyn, – delingen jedelhatta.
