Memleket basshysy Jumys tobymen birge konstitýtsiialyq reformaǵa qatysty negizgi tásilderdi talqylady, dep habarlaidy Dalanews.kz.
Astanada Prezident Qasym-Jomart Toqaevtyń qatysýymen Parlamenttik reforma jónindegi jumys tobynyń otyrysy ótti.
Jiynda Memlekettik keńesshi Erlan Qarin Prezidentke Jumys tobynyń atqarǵan qyzmeti týraly baiandap, Parlamentti transformatsiialaýǵa qatysty usynylyp otyrǵan konstitýtsiialyq ózgeristerdiń kólemi aýqymdy ekenine nazar aýdardy.
Memlekettik keńesshi Jumys toby músheleriniń ortaq pikirin jetkizip, bul ózgerister saiasi júieni ýaqyt talabyna sai jańǵyrtýǵa yqpal etetinin aitty.
Prezidenttiń quqyqtyq máseleler jónindegi kómekshisi Erjan Jienbaev azamattardan kelip túsken usynystar negizinde Konstitýtsiialyq reforma jónindegi jumys toby músheleri ázirlegen basty tásilder týraly baiandady.
Byltyrǵy qazan aiynan beri ótip kele jatqan otyrystarda jańa Parlamentke qatysty máselelerdiń bári qaraldy. Onyń ishinde depýtattar sany, ókilettik merzimderi, sailaý tártibi, bir palataly Parlamenttiń zań shyǵarý tetikteri, sondai-aq onyń biliktiń ózge institýttarymen ózara is-qimyl máseleleri qamtyldy.
Saiasi júieni odan ári reformalaýdyń mańyzy men mazmunyna toqtalǵan Prezident institýtsionaldyq negizdi tereń jańǵyrtý jáne zań shyǵarýshy bilik tarmaǵyn júieli túrde qaita formattaý qajet ekenin aitty.
"Erteń Ulttyq quryltai otyrysynda men elimizdiń taǵdyryna qatysty bul másele boiynsha naqty pikirlerimdi aitamyn. Naqtylai aitqanda, elimizdiń sapalyq turǵydan múldem jańa saiasi turpaty qalyptasyp jatyr. Parlamenttik reformany júzege asyrý úshin Konstitýtsiianyń birden birneshe bólimin qaita qaraý qajet bolady. Sondyqtan Ata zańymyzǵa osyǵan deiin engizilgen ózgertýlerdi eskersek, Jumys toby usynyp otyrǵan túzetýler jobasy Qazaqstannyń shyn máninde jańa Konstitýtsiiasy týraly aitýǵa múmkindik beredi", – dedi Memleket basshysy.
