Qasym-Jomart Toqaev Úkimetke bul bastamany keler jyldyń sáýir aiyna deiin shegerýdi tapsyrdy. QR Prezidentiniń baspasóz hatshysy Berik Ýáli:
– Memleket basshysy Qasym-Jomart Toqaev zeinetaqy jinaqtarynyń shekti mejesin kóterý týraly sheshimge qatysty kópshiliktiń ótinishine qulaq asty. Shekti meje kelesi jyldan bastap eń tómengi jalaqynyń ósýine bailanysty kóteriledi. Zeinetaqy júiesiniń negizgi mindeti – azamattardy zeinetke shyqqannan keiin qajetti jetkilikti tabyspen qamtamasyz etý. Sondyqtan zeinetaqy jinaqtarynyń shekti mejesin kóterý jónindegi sheshim negizinen osy baǵyttaǵy durys qadam. Sonymen qatar Memleket basshysy zeinetaqy qoryndaǵy shekti mejeden asqan qarjysyn paidalanyp úlgermegen azamattardy qoldap, Úkimetke burynǵy shekti mejeni kóterý merzimin 2022 jyldyń 1 sáýirine deiin uzartýdy tapsyrdy, – dedi.
Bul másele búgin Senatta da qozǵalǵan. Depýtattar zeinetaqy jinaǵyndaǵy shektik somaǵa qatysty sheshimdi qaita qaraýdy usyndy. Áitpese memleket basshysy Qasym-Jomart Toqaevtyń jinaqtaǵy qarjyny jaratý týraly bastamasy júzege aspai qalatynyn aityp alańdaýshylyq bildirgen bolatyn.
– Eger 2021 jyldyń basynda zeinetaqy jinaǵyndaǵy qarjysyn jarata alatyn azamattar sany 700 myń bolsa, 2022 jyly nábári 180 myń adam ǵana. Óitkeni shekti mólsher eń egde jastaǵy salymshylarǵa 63 paiyzdan, eń jasyna 83 paiyzǵa deiin ósti. Týyndaǵan jaǵdai azamattardyń baǵdarlamaǵa degen senimin azaitady, – degen bolatyn senator Nurlan Qylyshbaev.
