مەملەكەت باسشىسى قاسىم-جومارت توقايەۆ زەينەتاقى جيناعىنداعى شەكتى مولشەردىڭ كوتەرۋ ماسەلەسىنە قاتىستى جۇرتتىڭ تالابىنا جاۋاپ بەردى. بىرنەشە كۇننەن بەرى زەينەتاقى جيناعىنداعى شەكتى مولشەردىڭ كوتەرىلۋى كوپتىڭ قىزۋ تالقىسىنا تۇسكەنى بەلگىلى. ويتكەنى، مەجە كوتەرىلسە ازاماتتاردىڭ باسىم كوپشىلىگى اقشاسىن جاراتا الماي قالاتىنى بەلگىلى.

قاسىم-جومارت توقايەۆ ۇكىمەتكە بۇل باستامانى كەلەر جىلدىڭ ءساۋىر ايىنا دەيىن شەگەرۋدى تاپسىردى. ق ر پرەزيدەنتىنىڭ باسپا ءسوز حاتشىسى بەرىك ءۋالي:

– مەملەكەت باسشىسى قاسىم-جومارت توقايەۆ زەينەتاقى جيناقتارىنىڭ شەكتى مەجەسىن كوتەرۋ تۋرالى شەشىمگە قاتىستى كوپشىلىكتىڭ وتىنىشىنە قۇلاق استى. شەكتى مەجە كەلەسى جىلدان باستاپ ەڭ تومەنگى جالاقىنىڭ وسۋىنە بايلانىستى كوتەرىلەدى. زەينەتاقى جۇيەسىنىڭ نەگىزگى مىندەتى – ازاماتتاردى زەينەتكە شىققاننان كەيىن قاجەتتى جەتكىلىكتى تابىسپەن قامتاماسىز ەتۋ. سوندىقتان زەينەتاقى جيناقتارىنىڭ شەكتى مەجەسىن كوتەرۋ جونىندەگى شەشىم نەگىزىنەن وسى باعىتتاعى دۇرىس قادام. سونىمەن قاتار مەملەكەت باسشىسى زەينەتاقى قورىنداعى شەكتى مەجەدەن اسقان قارجىسىن پايدالانىپ ۇلگەرمەگەن ازاماتتاردى قولداپ، ۇكىمەتكە بۇرىنعى شەكتى مەجەنى كوتەرۋ مەرزىمىن 2022 جىلدىڭ 1 ساۋىرىنە دەيىن ۇزارتۋدى تاپسىردى، – دەدى.

بۇل ماسەلە بۇگىن سەناتتا دا قوزعالعان. دەپۋتاتتار زەينەتاقى جيناعىنداعى شەكتىك سوماعا قاتىستى شەشىمدى قايتا قاراۋدى ۇسىندى. ايتپەسە مەملەكەت باسشىسى قاسىم-جومارت توقايەۆتىڭ جيناقتاعى قارجىنى جاراتۋ تۋرالى باستاماسى جۇزەگە اسپاي قالاتىنىن ايتىپ الاڭداۋشىلىق بىلدىرگەن بولاتىن.

– ەگەر 2021 جىلدىڭ باسىندا زەينەتاقى جيناعىنداعى قارجىسىن جاراتا الاتىن ازاماتتار سانى 700 مىڭ بولسا، 2022 جىلى ءنابارى 180 مىڭ ادام عانا. ويتكەنى شەكتى مولشەر ەڭ ەگدە جاستاعى سالىمشىلارعا 63 پايىزدان، ەڭ جاسىنا 83 پايىزعا دەيىن ءوستى. تۋىنداعان جاعداي ازاماتتاردىڭ باعدارلاماعا دەگەن سەنىمىن ازايتادى، – دەگەن بولاتىن سەناتور نۇرلان قىلىشبايەۆ.