Memleket basshysy Qasym-Jomart Toqaev Soltústik Qazaqstan oblysynyń qurylǵanyna 90 jyl tolýyna arnalǵan saltanatty jiynǵa qatysýshylardy quttyqtady, dep habarlaidy dalanews.kz.
Prezident quttyqtaýynda Qyzyljar óńiri toǵyz onjyldyq ishinde damý jolynan ótip, elimizdiń mańyzdy óńirleriniń birine ainalǵanyn atap ótti.
«Qazirgi tańda Soltústik Qazaqstan elimizdiń astyqty aimaǵynyń biri sanalady. Dihandarymyz eginshilik kásiptiń qyr-syryn meńgerip, memleketimizdiń azyq-túlik qaýipsizdigin qamtamasyz etýge zor eńbek sińirip júr», - delingen quttyqtaýda.
Memleket basshysy óńirde aýyl sharýashylyǵymen qatar óńdeý ónerkásibi men mashina jasaý salalary qarqyndy damyp kele jatqanyn, investitsiialyq jobalar júzege asyrylyp, jańa óndiris oryndary ashylyp jatqanyn aitty.
Sondai-aq Prezident Soltústik Qazaqstannyń tarihi mańyzyn atap ótip, bul óńirden memleket jáne qoǵam qairatkerleri, mádeniet pen ádebiet ókilderi, eńbek ardagerleri, sportshylar men quqyq qorǵaý salasynyń bilikti mamandary shyqqanyn eske saldy.
Toqaev jýyrda kúshine engen Jańa Konstitýtsiianyń el damýy úshin mańyzyn atap ótip, oblys turǵyndarynyń Ata Zańdy qabyldaý isine belsendi qatysyp, birlik pen jaýapkershiliktiń úlgisin kórsetkenine toqtaldy.
Prezident oblysta túrli etnos ókilderi ózara qurmet pen dostyq dástúrin saqtap, tatý-tátti ómir súrip jatqanyn aityp, óńirdiń barlyq jetistigi azamattardyń jasampaz eńbeginiń nátijesi ekenin jetkizdi.
Memleket basshysy óńir turǵyndaryna amandyq, tabys tilep, Soltústik Qazaqstan oblysynyń odan ári ósip-órkendei berýine senim bildirdi.
