– Rım Papasy Fransısk Qazaqstanǵa alǵash ret apostoldyq saparmen keldi. Bıyl Qazaqstan men Vatıkan arasynda dıplomatıalyq qatynas ornaǵanyna 30 jyl toldy. Sizdiń saparyńyz osy mereıli mejege tuspa-tus kelip otyr. Biz bul saparǵa aıryqsha mán beremiz. Sebebi búgingi kezdesý bizdiń túrli saladaǵy yntymaqtastyǵymyzdy jańa deńgeıge kóteredi, – dedi Prezıdent.
Qasym-Jomart Toqaev adamzattyń ıgiligi jolyndaǵy Pontıfıktiń qajyrly jáne tabandy kúsh-jigerin qoldady.
– Siz Qazaqstanǵa adamzat tarıhyndaǵy betburys kezeńinde keldińiz. Túrli mádenıetter men dinder ókilderiniń beıbitshilik, áleýmettik úılesimdilik jáne ózara qoldaý kórsetý jolynda adamdardy biriktirý úshin danalyq pen kúsh-qýat kórsetetin ýaqyty jetti dep oılaımyn, – dedi Memleket basshysy.
Qasym-Jomart Toqaev Álemdik jáne dástúrli dinder kóshbasshylarynyń sıezerin ótkizý Qazaqstannyń álemdegi kelisim men dıalogty qamtamasyz etýge baǵyttalǵan kúsh-jigeriniń bir kórinisi ekenine nazar aýdardy.
– Sıez alǵash ret 2003 jyly shaqyrylǵan ýaqyttan beri adamdardyń áralýandyǵyna qaramastan olardy jaqyndastyrýdyń jaqsy úlgisine aınaldy. Tek dıalog, adamdardyń baýyrmaldyǵy men syılastyǵy ǵana birge beıbit ómir súrýge jáne toleranttyqqa jol ashatynyna kámil senemin. Osy rette men Qasıetti Taqtyń Sıez jumysyna ólsheýsiz úles qosyp, keń qoldaý kórsetkenin joǵary baǵalaımyn, – dedi Memleket basshysy.
Prezıdent sózin qorytyndylaı kele, Sezge katolık shirkeýi basshysynyń qatysýy sharanyń tabysty ótýine yqpal etip, búkil álemdegi katolıkterdiń júregine qýanysh pen shattyq uıalatatynyna senim bildirdi.
Budan keıin Rım Papasy Fransısk jıynǵa qatysýshylar aldynda sóz sóıledi. Ol ejelgi qazaq jerine jasaǵan apostoldyq saparyna kóńili tolatynyn jetkizdi. Pontıfıktiń aıtýynsha, ol munda dıalog pen birlik izdeý maqsatymen beıbitshiliktiń elshisi retinde kelgen.
– Sizderde «bereke basy – birlikte» degen mátel bar. Bul barlyq jerde, ásirese osy jerde mańyzdy uǵym ekeni sózsiz. Elde 150-ge jýyq etnıkalyq top pen seksennen astam til bar. Ártúrli tarıhy, mádenı jáne dinı dástúrleri bar bul halyqtar birlese, adam aıtsa nanǵysyz yntymaqtastyq ornatqan. Sondaı-aq, Qazaqstandy kópultty, mýltımádenıetti, kópkonfessıaly biregeı mekenge aınaldyrdy jáne bul memlekettiń Kezdesýler eli degen erekshe atyna saı keledi, – dedi Pontıfık.
Pontıfık qarýsyzdaný, ıadrolyq qarýdy taratpaý, ekonomıkany kómirteginen aryltý jáne energıanyń balamaly kózderine ınvestısıa quıý jónindegi Qazaqstannyń kúsh-jigerin joǵary baǵalady.
– Dinaralyq dıalog ornatý isimen qatar munyń bári adamzattyń ortaq bolashaǵy úshin egilgen úmit dáni. Qasıetti Taq osy jolda sizderdi qoldaıdy, – dedi Rım Papasy.
Katolık shirkeýiniń basshysy sóziniń sońynda Qasym-Jomart Toqaevqa kórsetken qonaqjaılyǵy úshin rızashylyǵyn bildirip, elimizge beıbitshilik pen birlik tiledi.
Jıyn sońynda Qazaqstan Prezıdenti Pontıfıkke jyly lebizi men elimizge degen qurmeti, sondaı-aq mazmundy sózi úshin alǵys aıtty.
