Prezıdent bul kúni toılaýdan góri, aýyl turǵyndarymen ózekti máseleler jóninde pikir almasýdy jón kórgen.
– Qordaıda bolǵan oqıǵa halqymyzdy dúr silkindirdi, búkil álemdi eleń etkizdi. Shyny kerek, bul janjal memleketimizge, elimizge nuqsan keltirdi. Abyroıymyzǵa zıany tıdi. Endi tutas ult bolyp osyndaı keleńsizdikten sabaq alýymyz kerek. Eń aldymen, keleshekte mundaı qasiretti boldyrmaý úshin tıisti shara qoldanýymyz qajet, – dep atap ótti Prezıdent.
Memleket basshysy Qasym-Jomart Toqaev Elbasy Nursultan Nazarbaevtyń saıasatynyń arqasynda Qazaqstannyń álem jurtshylyǵyna bedeldi, abyroıly, qarqyndy damyp kele jatqan el retinde tanymal bolǵanyn qordaılyqtarǵa aıta kele, endigi mindet osy jetistikterdi saqtap qalý, ony barynsha arttyrý ekenin atap ótti.
Jambyl oblysynyń jańa basshylyǵynyń aldyna aımaqtyń ósip-órkendeýin tejeıtin kedergilerdi joıyp, halyqtyń ál-aýqatyn arttyratyn sharalar qabyldaý mindeti qoıyldy.
– Qaqtyǵys bolǵan jerde eshqashan, eshqandaı damý bolmaıdy. Bul – zańdylyq. Ókinishke qaraı, oblys basshylary bul zańdylyqty durys túsingen joq.
Sondyqtan oblys basshylary, sonyń ishinde quqyq qorǵaý organdarynyń basshylary tolyǵymen aýystyryldy, qyzmetkerler jumystan bosatyldy. Jańa basshylar taǵaıyndaldy.
Solardyń arasynda Berdibek Saparbaev bar. Bul azamatty jaqsy tanısyzdar. Tájirıbesi mol memlekettik qyzmetshi. Onyń aldynda turǵan maqsat – turaqsyzdyqqa túrtki bolatyn jaǵdaılardy túbegeıli joıý jáne óńirdiń damýyna serpin berý, – dedi Qasym-Jomart Toqaev.
Prezıdenttiń aıtýynsha, Táýelsizdiktiń arqasynda qazaq halqy shyn mánindegi memleket quraýshy ultqa aınaldy. Munyń mańyzy tereń. Eń aldymen, bul – memleketimizdiń bolashaǵy úshin erekshe jaýapkershilik, qasıetti borysh. Aýyl aqsaqaldary osy baǵytta jumys júrgizip, eldegi bereke-birlikti nyǵaıtyp, jastarymyzǵa durys jol kórsetip, tárbıe berýi kerek.
– Tól halqymyzdyń shynaıy qasıetteri, bolmysy qandaı bolýy kerek? Bul, eń aldymen, keńshilik, jomarttyq, jaısańdyq, jasampazdyq degen sóz. Biz basqa ulttarǵa, ózge elderge ónege, úlgi kórsetýimiz kerek.
Qazaq halqy beıqam, jalqaý, erinshek, onyń qolynan eshqandaı jumys kelmeıdi degen jaǵymsyz áńgimelerdi doǵarý qajet.
Biraq osyndaı teris pikirlerdi toqtatý úshin ózimizdiń eńbekqorlyǵymyzdy kórsetýimiz kerek, – dep Memleket basshysy aqsaqaldardy urpaq tárbıesinde belsendilik tanytýǵa shaqyrdy.
Prezıdent tergeý jumystary zańǵa sáıkes júrgiziletinin, zań aldynda bári teń ekenin aıtyp, Qordaıdaǵy jergilikti qyzmetkerlerdiń para alý jáne shekara arqyly zańsyz saýda jasaý máselelerin sheshýdi tapsyrdy.
– Aýdanda bir top adam belsendi túrde kontrabandamen aınalysyp júrgen. Bul – belgili nárse. Osy iske basqa top ta qatysqysy kelgen. Bir sózben aıtsaq, zańsyz tabys kózi úshin eki qylmystyq toptyń arasynda teketires paıda bolǵan. Bul teketires saldarynan kóp adam zardap shekti. 11 adam qaza tapty. Ony ashyq aıtý kerek. Endi quqyq qorǵaý organdarynyń aldynda turǵan maqsat – barlyq qylmyskerlerdi ultyna qaramaı, zańǵa sáıkes jazaǵa tartý. Onsyz elimizde tártip bolmaıdy, – dedi Prezıdent.
Sondaı-aq kezdesýde Qordaı aýdandyq ardagerler keńesiniń tóraǵasy Ábdibek Seıilhanov, Jambyl oblysynyń «Qurmetti azamaty» Tóle Súgirbaı sóz sóılep, aýdandaǵy áleýmettik jáne basqa da máselelerdi sheshý jóninde óz oılaryn ortaǵa saldy.
– Ultaralyq tatýlyq – bizdiń eń basty qundylyǵymyz. Sondyqtan oǵan syzat túsirmeýimiz kerek, – dep Qasym-Jomart Toqaev jıyndy qorytyndylady.
Budan keıin Memleket basshysy Qarakemer aýylynyń sport keshenine baryp, jas sportshylardyń jattyǵý barysyn kórdi. Bolashaq sportshylarǵa tabys tilep, olarǵa qajetti doptar men boks qolǵaptaryn syıǵa tartty.
