پرەزيدەنت بۇل كۇنى تويلاۋدان گورى، اۋىل تۇرعىندارىمەن وزەكتى ماسەلەلەر جونىندە پىكىر الماسۋدى ءجون كورگەن.
– قوردايدا بولعان وقيعا حالقىمىزدى ءدۇر سىلكىندىردى، بۇكىل الەمدى ەلەڭ ەتكىزدى. شىنى كەرەك، بۇل جانجال مەملەكەتىمىزگە، ەلىمىزگە نۇقسان كەلتىردى. ابىرويىمىزعا زيانى ءتيدى. ەندى تۇتاس ۇلت بولىپ وسىنداي كەلەڭسىزدىكتەن ساباق الۋىمىز كەرەك. ەڭ الدىمەن، كەلەشەكتە مۇنداي قاسىرەتتى بولدىرماۋ ءۇشىن ءتيىستى شارا قولدانۋىمىز قاجەت، – دەپ اتاپ ءوتتى پرەزيدەنت.
مەملەكەت باسشىسى قاسىم-جومارت توقايەۆ ەلباسى نۇرسۇلتان نازاربايەۆتىڭ ساياساتىنىڭ ارقاسىندا قازاقستاننىڭ الەم جۇرتشىلىعىنا بەدەلدى، ابىرويلى، قارقىندى دامىپ كەلە جاتقان ەل رەتىندە تانىمال بولعانىن قوردايلىقتارعا ايتا كەلە، ەندىگى مىندەت وسى جەتىستىكتەردى ساقتاپ قالۋ، ونى بارىنشا ارتتىرۋ ەكەنىن اتاپ ءوتتى.
جامبىل وبلىسىنىڭ جاڭا باسشىلىعىنىڭ الدىنا ايماقتىڭ وسىپ-وركەندەۋىن تەجەيتىن كەدەرگىلەردى جويىپ، حالىقتىڭ ءال-اۋقاتىن ارتتىراتىن شارالار قابىلداۋ مىندەتى قويىلدى.
– قاقتىعىس بولعان جەردە ەشقاشان، ەشقانداي دامۋ بولمايدى. بۇل – زاڭدىلىق. وكىنىشكە قاراي، وبلىس باسشىلارى بۇل زاڭدىلىقتى دۇرىس تۇسىنگەن جوق.
سوندىقتان وبلىس باسشىلارى، سونىڭ ىشىندە قۇقىق قورعاۋ ورگاندارىنىڭ باسشىلارى تولىعىمەن اۋىستىرىلدى، قىزمەتكەرلەر جۇمىستان بوساتىلدى. جاڭا باسشىلار تاعايىندالدى.
سولاردىڭ اراسىندا بەردىبەك ساپاربايەۆ بار. بۇل ازاماتتى جاقسى تانيسىزدار. تاجىريبەسى مول مەملەكەتتىك قىزمەتشى. ونىڭ الدىندا تۇرعان ماقسات – تۇراقسىزدىققا تۇرتكى بولاتىن جاعدايلاردى تۇبەگەيلى جويۋ جانە ءوڭىردىڭ دامۋىنا سەرپىن بەرۋ، – دەدى قاسىم-جومارت توقايەۆ.
پرەزيدەنتتىڭ ايتۋىنشا، تاۋەلسىزدىكتىڭ ارقاسىندا قازاق حالقى شىن مانىندەگى مەملەكەت قۇراۋشى ۇلتقا اينالدى. مۇنىڭ ماڭىزى تەرەڭ. ەڭ الدىمەن، بۇل – مەملەكەتىمىزدىڭ بولاشاعى ءۇشىن ەرەكشە جاۋاپكەرشىلىك، قاسيەتتى بورىش. اۋىل اقساقالدارى وسى باعىتتا جۇمىس جۇرگىزىپ، ەلدەگى بەرەكە-بىرلىكتى نىعايتىپ، جاستارىمىزعا دۇرىس جول كورسەتىپ، تاربيە بەرۋى كەرەك.
– ءتول حالقىمىزدىڭ شىنايى قاسيەتتەرى، بولمىسى قانداي بولۋى كەرەك؟ بۇل، ەڭ الدىمەن، كەڭشىلىك، جومارتتىق، جايساڭدىق، جاسامپازدىق دەگەن ءسوز. ءبىز باسقا ۇلتتارعا، وزگە ەلدەرگە ونەگە، ۇلگى كورسەتۋىمىز كەرەك.
قازاق حالقى بەيقام، جالقاۋ، ەرىنشەك، ونىڭ قولىنان ەشقانداي جۇمىس كەلمەيدى دەگەن جاعىمسىز اڭگىمەلەردى دوعارۋ قاجەت.
ءبىراق وسىنداي تەرىس پىكىرلەردى توقتاتۋ ءۇشىن ءوزىمىزدىڭ ەڭبەكقورلىعىمىزدى كورسەتۋىمىز كەرەك، – دەپ مەملەكەت باسشىسى اقساقالداردى ۇرپاق تاربيەسىندە بەلسەندىلىك تانىتۋعا شاقىردى.
پرەزيدەنت تەرگەۋ جۇمىستارى زاڭعا سايكەس جۇرگىزىلەتىنىن، زاڭ الدىندا ءبارى تەڭ ەكەنىن ايتىپ، قوردايداعى جەرگىلىكتى قىزمەتكەرلەردىڭ پارا الۋ جانە شەكارا ارقىلى زاڭسىز ساۋدا جاساۋ ماسەلەلەرىن شەشۋدى تاپسىردى.
– اۋداندا ءبىر توپ ادام بەلسەندى تۇردە كونتراباندامەن اينالىسىپ جۇرگەن. بۇل – بەلگىلى نارسە. وسى ىسكە باسقا توپ تا قاتىسقىسى كەلگەن. ءبىر سوزبەن ايتساق، زاڭسىز تابىس كوزى ءۇشىن ەكى قىلمىستىق توپتىڭ اراسىندا تەكەتىرەس پايدا بولعان. بۇل تەكەتىرەس سالدارىنان كوپ ادام زارداپ شەكتى. 11 ادام قازا تاپتى. ونى اشىق ايتۋ كەرەك. ەندى قۇقىق قورعاۋ ورگاندارىنىڭ الدىندا تۇرعان ماقسات – بارلىق قىلمىسكەرلەردى ۇلتىنا قاراماي، زاڭعا سايكەس جازاعا تارتۋ. ونسىز ەلىمىزدە ءتارتىپ بولمايدى، – دەدى پرەزيدەنت.
سونداي-اق كەزدەسۋدە قورداي اۋداندىق ارداگەرلەر كەڭەسىنىڭ ءتوراعاسى ابدىبەك سەيىلحانوۆ، جامبىل وبلىسىنىڭ «قۇرمەتتى ازاماتى» تولە سۇگىرباي ءسوز سويلەپ، اۋدانداعى الەۋمەتتىك جانە باسقا دا ماسەلەلەردى شەشۋ جونىندە ءوز ويلارىن ورتاعا سالدى.
– ۇلتارالىق تاتۋلىق – ءبىزدىڭ ەڭ باستى قۇندىلىعىمىز. سوندىقتان وعان سىزات تۇسىرمەۋىمىز كەرەك، – دەپ قاسىم-جومارت توقايەۆ جيىندى قورىتىندىلادى.
بۇدان كەيىن مەملەكەت باسشىسى قاراكەمەر اۋىلىنىڭ سپورت كەشەنىنە بارىپ، جاس سپورتشىلاردىڭ جاتتىعۋ بارىسىن كوردى. بولاشاق سپورتشىلارعا تابىس تىلەپ، ولارعا قاجەتتى دوپتار مەن بوكس قولعاپتارىن سىيعا تارتتى.
