Prezident Qasym-Jomart Toqaev Resei Federatsiiasy Úkimetiniń tóraǵasy Mihail Mishýstinmen kezdesti. Memleket basshysy «Aqorda» rezidentsiiasynda Eýraziialyq úkimetaralyq keńeske jáne Digital Almaty 2025 tsifrlyq forýmyna qatysý úshin Qazaqstanǵa kelgen Reseidiń Premer-ministri Mihail Mishýstinmen kezdesý ótkizdi, dep habarlaidy Dalanews.kz.
Kezdesýde eki eldiń strategiialyq seriktestigin damytý perspektivasy talqylanyp, saýda-ekonomikalyq, investitsiialyq yntymaqtastyqty, sonyń ishinde Eýraziialyq ekonomikalyq odaq aiasyndaǵy qarym-qatynasty jandandyrýǵa basa nazar aýdaryldy.
Qasym-Jomart Toqaev eki el arasyndaǵy dostyq pen tatý kórshilikti nyǵaitýǵa Mihail Mishýstinniń qosqan úlesin joǵary baǵalady. Sonymen qatar Resei Federatsiiasynyń Prezidenti Vladimir Pýtinniń byltyr 27 qarashada Astanaǵa jasaǵan memlekettik sapary kezinde qol jetkizilgen ýaǵdalastyqtardy júzege asyrýdyń ózekti ekenin atap ótti.
Elderimizdiń arasyndaǵy bailanys beki tústi. Bul memleketaralyq yntymaqtastyqtyń barlyq salasyn qamtidy. Sizdiń Astanaǵa jasaǵan saparyńyzdy joǵary deńgeide qol jetkizilgen ýaǵdalastyqtardy iske asyrýdyń mańyzdy kezeńi retinde qarastyramyz. Vladimir Pýtinniń Qazaqstanǵa jasaǵan sapary barysynda Ýfada óńiraralyq forým tabysty ótti. Biyl biz kezekti forýmdy Qazaqstan aýmaǵynda, iaǵni Oral qalasynda uiymdastyrýdy josparlap otyrmyz. Yntymaqtastyqtyń osy formaty nátijeli bolady dep oilaimyn, – dedi Prezident.
Mihail Mishýstin memleketter basshylary alǵa qoiǵan mindetterdi naqty iske asyrýǵa daiyn ekenin málimdedi.
Oraily sátti paidalana otyryp, Resei Prezidenti Vladimir Pýtinniń ystyq yqylasyn jetkizgim keledi. Vladimir Vladimirovich byltyr qarasha aiynda Qazaqstanǵa tarihi memlekettik sapar jasady deýge bolady. Qasym-Jomart Kemeluly, Siz de jeltoqsan aiynda Reseidiń Sankt-Peterbýrg qalasyna keldińiz. Biz úshin óńiraralyq forýmnyń bereri mol. Reseidiń aimaqtary Qazaqstannyń kóptegen oblysymen tikelei bailanys ornatqan. Ózińiz atap ótkendei, bul formattyń mańyzy zor, onyń tiimdiligin arttyrýǵa barynsha qoldaý kórsetemiz. Qazaqstan – Resei Federatsiiasynyń kórshisi ári odaqtasy. Bizdiń qarym-qatynasymyz dostyq pen ózara qurmetke negizdelgen, – dedi Resei Úkimetiniń tóraǵasy.
Mihail Mishýstin Qasym-Jomart Toqaevqa eki eldiń úkimettik delegatsiialary arasynda júrgizilgen kelissózderdiń nátijesi týraly aqparat berip, kún tártibiniń barlyq spektri boiynsha qol jetkizilgen ýaǵdalastyqtardyń ózara tiimdi yqpaldastyqty odan ári nyǵaitýǵa qyzmet etetinine toqtaldy.
Kezdesýde energetika, ónerkásip, kólik infraqurylymy, aýyl sharýashylyǵy jáne basqa da salalardaǵy birlesken jobalardy júzege asyrýǵa basa nazar aýdaryldy. Sonymen qatar ǵylymi-tehnikalyq jáne mádeni-gýmanitarlyq yntymaqtastyqtyń ózekti máseleleri talqylandy.
Memleket basshysy Resei Prezidentiniń Máskeýdegi Jeńistiń 80 jyldyǵyna arnalǵan merekelik is-sharaǵa shaqyrýyn qabyl alǵanyn aitty.
