Qazaqstan prezidenti Qasym-Jomart Toqaev Al Jazeera telearnasyna bergen ekskliýziv suqbatynda munai tasymaldaýdyń balama baǵyttaryna qatysty saýalǵa jaýap berdi, dep habarlaidy Dalanews.kz Kazinform-ǵa silteme jasai otyryp.
Al Jazeera: Ótken jyly S&P Global agenttigi Qazaqstan munaiynyń shamamen 80 paiyzy KQK jelisi arqyly Reseige ketip jatqanyn aitqan edi. Muny ózgertý qajet dep sanamaisyz ba? Qazaqstan úshin bul strategiialyq álsizdik bolyp eseptelmei me?
– Resei Qazaqstannyń strategiialyq seriktesi, tikelei kórshimiz ári odaqtasymyz ekenin esh esten shyǵarmaý qajet. Reseimen eki arany álemdegi eń uzyn shekara bólip jatyr. Biz Reseige strategiialyq seriktesimiz retinde arqa súieimiz, ásirese KQK jelisine senim artamyz. Taiaýda ǵana prezident Pýtinmen telefon arqyly sóilestim jáne biz KQK jelisine qatysty máselelerdi talqyladyq. Qazaqstan munaiyn Resei arqyly Eýropa naryǵyna jáne odan ary tasymaldaýda KQK tiimdi qural retinde turaqty túrde qyzmet ete beredi dep sanaimyn.
Al Jazeera: Sonda Sizdi Ýkrainadaǵy soǵystyń yqpaly jáne Qazaqstan munaiyn atalǵan qubyr arqyly Eýropaǵa jetkizý múmkindigi qanshalyqty mańyzdy ekeni alańdatpai ma?
– Árine, biz Ýkrainadaǵy ahýaldy, Resei men Ýkraina arasyndaǵy áskeri qaqtyǵys bizdiń tabiǵi resýrstar men olardy halyqaralyq naryqqa eksporttaýǵa qatysty strategiialyq josparlarymyzǵa yqpal etetinin esepke alamyz. Degenmen Resei elimizdiń strategiialyq seriktesi ekenine de nyq senimdimiz. Biraq bul bizdiń tek bir ǵana kólik baǵdarymen nemese baǵytpen shekteledi degendi bildirmeidi. Sondyqtan Baký-Jeihan, Orta dáliz qubyr jelisi syndy ózge baǵyttar jaiyn óte durys meńzep otyrsyz. Al shetelge tasymaldanatyn nemese eksporttalatyn munai kólemi turǵysynan alǵanda, qalai desek te, basymdyq KQK-ǵa beriledi jáne ol solai bolýǵa tiis.
Aita ketsek, dúisenbiden Oljas Bektenov KQK basshysymen qazaq munaiy tasymaly máselesin talqylaǵan bolatyn.
