Qasym-Jomart Toqaev Atom energiiasy jónindegi halyqaralyq agenttiktiń Bas direktory Rafael Grossige iltipat bildire otyryp, onyń sapary Qazaqstan men Agenttik arasyndaǵy yntymaqtastyqty odan ári nyǵaitý úshin mańyzdy ekenin atap ótti.
– Sizdiń saparyńyz ózara qarym-qatynasymyzdy damytý turǵysynan der kezinde jasalyp otyrǵanyna senimdimin. Qazaqstan úshin Agenttikpen jumys isteýdiń máni zor. Asa mańyzdy qurylymnyń basshysy retindegi Sizdiń qyzmetińizdi qoldaimyz jáne joǵary baǵalaimyz, – dedi Prezident.
Kezdesý barysynda tehnikalyq saladaǵy yntymaqtastyqty nyǵaitýǵa jáne elimizde AES salýǵa qatysty aýqymdy máseleler talqylandy.
Prezident atom energiiasyn beibit maqsatta paidalaný jáne iadrolyq qaýipsizdik rejimin nyǵaitý máselelerinde Agenttiktiń mańyzdy ról atqaratynyn atap ótti.
Rafael Grossi qurmet kórsetkeni úshin Qasym-Jomart Toqaevqa alǵys aityp, iadrolyq qarýdan bas tartý jáne ony taratpaý úderisi kóshbasshylarynyń biri ári jaýapty jaqtaýshysy retinde Qazaqstannyń rólin joǵary baǵalady.
– Biz túrli salada kóp isti birge atqaryp kelemiz. Densaýlyq saqtaý salasynan bastap iadrolyq energetikany damytýǵa qatysty bolashaq baǵdarlamańyzǵa deiin kóptegen másele boiynsha Sizben pikir almasatynyma óte qýanyshtymyn, – dedi Atom energiiasy jónindegi halyqaralyq agenttiktiń Bas direktory.
