Memleket basshysy Qasym-Jomart Toqaevtyń tapsyrmasyna sáikes, Kóbeituz kóli erekshe qorǵalatyn tabiǵi aýmaq mártebesine ie bolady, dep habarlaidy dalanews.kz.
Osy maqsatta «Buirataý» memlekettik ulttyq tabiǵi parkiniń aýmaǵy keńeitilip, onyń quramyna Kóbeituz kóliniń akvatoriiasy engiziledi, dep habarlaidy Dalanews.
Bul sheshim kóldiń biregei ekojúiesin qorǵaýǵa baǵyttalǵan. Elordadan 160 shaqyrym jerde ornalasqan Kóbeituz sýynyń erekshe qyzǵylt túsimen tanymal jáne jyl saiyn myńdaǵan týristi qabyldaidy.
Kelýshiler sanynyń artýyna bailanysty Aqmola oblysynyń ákimdigi kól mańyndaǵy infraqurylymdy damytý jumystaryn bastaidy. Joba aiasynda baqylaý alańy men avtoturaq salynyp, týristerdiń tabiǵi nysandy qaýipsiz tamashalaýyna jaǵdai jasalady. Bul rette kóldiń názik ekojúiesine ziian keltirmeý basty talap retinde saqtalady.
Kóbeituzdy tabiǵi qalpynda saqtaý memlekettiń ekologiialyq saiasatynyń mańyzdy baǵyttarynyń biri retinde qarastyrylyp otyr. Erekshe qorǵalatyn tabiǵi aýmaqtar jelisin keńeitý de osy maqsatqa qyzmet etedi.
Sonymen qatar kóldi qorǵaý jáne jaǵalaýdy abattandyrý jumystary «Taza Qazaqstan» jalpyulttyq ekologiialyq bastamasy aiasynda júzege asyrylady.
Buǵan deiin Aqmola oblysynyń tabiǵi resýrstar jáne tabiǵat paidalanýdy retteý basqarmasy júrgizgen zertteý nátijesinde kól sýyndaǵy ammoniili azot, ammiak, hloridter, myshiak, sýlfattar jáne basqa da birqatar zattardyń mólsheri shekti ruqsat etilgen kontsentratsiiadan joǵary ekeni anyqtalǵan. Osyǵan bailanysty Kóbeituzda shomylýǵa jáne jaǵalaýdan tuz jinaýǵa qatań tyiym salynǵan.
Abattandyrý jumystary júrgiziletin kezeńde kólge kirý ýaqytsha shekteledi. Jaǵalaý syzyǵyna jaqyndaýǵa jáne belgilengen shekteý aimaǵyna ótýge ruqsat berilmeidi. Kólge aparatyn joldarda táýlik boiy baqylaý beketteri qoiylyp, aýmaqty politsiia qyzmetkerleri men ýákiletti organdar birlesip kúzetedi.
Aqmola oblysynyń ákimdigi turǵyndar men týristerdi tabiǵatty qorǵaý talaptaryn saqtaýǵa jáne Kóbeituzdyń biregei ekojúiesin keler urpaq úshin birge qorǵaýǵa shaqyrdy.
