Saryarqa óńiriniń talaı tarıhı oqıǵanyń kýási bolǵanyn tilge tıek etken Memleket basshysy aımaqtyń ekonomıkalyq áleýetine jeke toqtaldy.
Onyń atap ótkenindeı Qaraǵandynyń ınvestısıalyq tartymdylyǵyn arttyrýǵa basymdyq berý qajet. Ol úshin toǵyz joldyń torabyndaǵy oblystyń avtokólik joldary sapaly bolýy tıis.
Prezıdent Balqash qalasy arqyly ótetin joldyń qurylysy óte sylbyr júrip jatqanyn synǵa aldy. Qurylys merzimi qaıta-qaıta keıinge shegerilýde.
Osy máselege qumbyl kóńil bólgen Memleket basshysy Smaıylov úkimetine "Qaraǵandy - Balqash" jáne "Balqash - Býrylbaıtal" tas jolyn keler jyldyń sońyna deıin salyp támámdaýdy tapsyrdy.
"Sonymen qatar, "Qaraǵandy - Jezqazǵan" kúre joly da asa mańyzdy. Uzyndyǵy 500 shaqyrymnan asyp jyǵylatyn jol jóndelse, ortalyq óńirlerge barys-kelis jaqsarady. Júk tasymaly artady. Bul Ulytaý oblysyn damytýǵa zor septigin tıgizedi. Eki óńirdiń ınvestısıalyq jáne týrısik potensıaly artady. Osy joldy jóndeý dereý kirisý kerek", – dedi prezıdent.
Prezıdent nazar aýdarǵan taǵy bir aktýaldy másele: kásiporyndardaǵy eńbek qaýipsizdigin qamtamasyz etý.
Toqaevtyń aıtýynsha oblys basshylary bul máseleni elep-eskere bermeıdi, eńbek qaýipsizdigin qamtamasyz etý syn kótermeıdi.
Aıta ketelik, bıyl "Arselor Mıttal Temirtaý" nysandarynda jumysshylar qaza tapqan qaıǵyly oqıǵalar tirkelgen.
Memleket basshysy óńirdegi iri óndiris oryndarynyń basshylaryna qatań eskertý jasap, óndiristiń ınfraqurylymyn jańartýǵa udaıy ınvestısıa quıý kerektigin eske saldy.
Jańa Qazaqstan óńirde jumys isteıtin alpaýyt kompanıalardyń qyzmetin jiti baqylaýǵa kóshken.
Budan bylaı kapıtaldy shetelge zańsyz shyǵarýǵa jol berilmeıdi. Kompanıalar tapqan tabysyn aımaqtaǵy áleýmettik baǵdarlamalarǵa baǵyttaýy tıis. Ekologıa máselesi de shet qalmaıdy.
Sóı degen Toqaev: "Salyq máselesi? Eger iri óndiris oryndary bul talapqa saı kelmese, áriptestikti toqtatamyz. Bul qorqytyp, úrkitý emes. Jańa Qazaqstan órkenıetti, damyǵan elderde qabyldanǵan adal jáne ádil erejeler boıynsha jumys isteıtin bolady", – dedi.
Prezıdent osy rette elimizde olıgarhıanyń dáýiri ótip, shendi-shekpendiler elge esep beretin kezeń kelgenin aıtty.
"Halyqtyń aldynda jaýapkershilikti sezinetin bıznes ókilderimen árkezde seriktesip jumys isteýge ázirmiz", – dedi Memleket basshysy.
