Erteń Qasym-Jomart Toqaev el tizginin qolyna alǵanyna alty jyl. Osyǵan orai Dalanews.kz saiasattanýshy Qazybek Maigeldinovtiń pikirin surady.
Sarapshynyń pikirinshe, Memleket basshysy jumysqa kiriskeli saiasi transformatsiia baǵytyndaǵy reformalar qolǵa alynǵan.
"2019 jyly 19 naýryz kúni, osydan týra 6 jyl buryn elimizdegi saiasi tranzittiń basty aktisi ótti deýge bolady. 2019 jyly Qasym-Jomart Kemeluly Toqaev bilikke kelgeli áýeli saiasi transformatsiia jasaý, iaǵni saiasi transformatsiia baǵytyndaǵy reformalar qolǵa alyndy. Búginde ol Toqaevtyń saiasi reformalarynyń paketteri atymen belgili. Jalpy saiasi reformalarynyń bes paketi qabyldandy. Ol jalǵasatyn shyǵar. Óitkeni jýyrda ótken Ulttyq quryltaidyń IV otyrysynda Prezidentimiz bul saiasi transformatsiianyń aldaǵy ýaqytta da, ásirese, ishki saiasatty ońtailandyrý baǵytynda jalǵasatynyn aitqan bolatyn", - dedi sarapshy.
Saiasattanýshy alty jyldaǵy basty ózgeristerdi atady.
"2019 jyldan bastap eldegi eń basty ózgeris bul, árine, bilik qurylymdary arasyndaǵy tepe-teńdikti qaita qaraý. Iaǵni sheshim qabyldaý ortalyqtary men bilik tetikteriniń jańa araqatynasy ornady. Eń birinshiden, bul - Prezidenttiń ókilettiligin shekteý. Jeti jyldyq, bir rettik merzimmen. Árine, AQSh-taǵydai tórt jyldyq etýge bolatyn edi. Biraq qazirgi tańdaǵy saiasi ahýaldy eskere otyryp, elimiz damýshy memleketter qatarynda bolǵandyqtan, demokratiialyq institýttar qalyptasýy áli de jalǵasyp jatqannan keiin kez kelgen reformany nemese ózgeristi júzege asyrý úshin jeti jyldyq merzim qajet degen sheshim qabyldandy. Odan bólek elimizdegi sailaý júiesi ózgertildi. Bul da bolsa eldegi jańa saiasi kúshter paida bolyp, sheshim qabyldaý ortalyqtarynyń ártaraptandyrylýyna basty qadam. Nátijesinde bizde bir mandatty okrýg arqyly depýtattyqqa sailanýǵa múmkindik boldy", - dedi ol.
Qazybek Maigeldinov ózgeristerdiń biri retinde elde kóppartiialy júie paida bolýyna jasalǵan alǵysharttardy atady.
"Mejeni túsirý arqyly jańa saiasi partiialardyń, saiasi kóptúrliliktiń júzege asýyna múmkindik jasaldy. Qazirgi tańda jańa saiasi partiialardyń ishinen Respublica, Baitaq partiialaryn aitýǵa bolady, Yntymaq partiiasy da tirkeýden ótýge tyrysyp jatyr. Bul - jaqsy úrdis. Óitkeni elde neǵurlym túrli-túrli saiasi kózqarastar, saiasi kúshter bolsa, soǵurlym básekelestik te artady", - dedi sarapshy.
Saiasattanýshynyń sózinshe, memlekettik apparattyń jaýapkershiligin arttyrý - Prezidenttiń kúndelikti aityp júrgen kún tártibindegi basty qaǵidaty.
"Jaýapkershilik bolmai, kez kelgen reformany, kez kelgen bastamany júzege asyrý qiyn. Bizde ákimderdi halyq suraǵandai, halyq talabyna sai tikelei sailaý bastaldy. Aldymen aýyl ákimderin tikelei sailady. Byltyr aýdan ákimderin jáne respýblikalyq deńgeiindegi qala ákimderin sailady. Aldaǵy ýaqytta bálkim oblys ákimderin de tikelei sailaýǵa keletin siiaqtymyz. Bul da óte jaqsy úrdis", - dep baǵalady ol.
Sarapshynyń paiymynsha, elimizdiń birtutastyǵyn, turaqtylyǵyn saqtaý úshin qansha degenmen de biliktiń, sheshim qabyldaý ortalyǵynyń myqtylyǵy kerek.
"Degenmen de sýper prezidenttikten kettik. Sýper prezidenttikten arylý úshin Konstitýtsiiada barlyq ózgeris jasaldy. Endi alda jergilikti ózin-ózi basqarý, azamattyq qoǵam jáne bilik pen qoǵam arasyndaǵy kópirdiń odan ári qarai ulǵaiýyn, azamattardyń sheshim qabyldaý úrdisine tikelei qatysýǵa múmkindik alýyn kútemiz. Meniń oiymsha, alty jyldaǵy basty saiasi reformalardyń nátijesi osyndai boldy.
Ekonomikalyq, áleýmettik baǵyttarda Áleýmettik, Biýdjet, Salyq kodeksteri de bar. Biri memlekettik biýdjetti durys paidalaný úshin bolsa, endi biri áleýmettik tólemderdi joǵarylatý maqsatynda. Prezident aitqandai, biz - áleýmettik memleketpiz. Áleýmettik teńsizdikti joiý - basty maqsatymyz. Bul baǵytta da saiasi reformalarmen qatar jasalyp jatqan áreketter bar.
Biýrokratiiany joiýdaǵy, memlekettik basqarýǵa jasandy intellektini engizýdegi maqsat - zaman talabyna sai, búgingi tańdaǵy tiimdiligi joǵary memlekettik apparat qurý. Óitkeni osy baǵyt durys jolǵa qoiylsa, onda ekonomikalyq, áleýmettik reformalardyń júzege asý sapasy da artady", - dep túiindedi Maigeldinov.
Dalanews.kz anyqtamasy: Qasym-Jomart Toqaev 2019 jylǵy 20 naýryzda Qazaqstan Respýblikasynyń Prezidenti retinde ant qabyldady.
2019 jyly 9 maýsymda ótken kezekten tys Prezident sailaýynda 70,96 paiyz daýys jinap, Qazaqstan Respýblikasynyń Prezidenti bolyp sailandy. 2019 jyly 12 maýsymda QR Konstitýtsiiasynyń 42-babyna sáikes ant berip, resmi túrde sailanǵan Prezident retinde Memleket basshysynyń laýazymyna kiristi.
Qasym-Jomart Toqaev 2022 jylǵy 20 qarashada ótken kezekten tys prezident sailaýynda 81,31% daýys jinap, jeńiske jetti. 2022 jyly 26 qarashada Qazaqstan Respýblikasy Prezidentin saltanatty ulyqtaý rásimi ótti.
Eske salaiyq, buǵan deiin premer-ministr Oljas Bektenov Qasym-Jomart Toqaev týraly maqala jazdy.
