ەرتەڭ قاسىم-جومارت توقايەۆ ەل تىزگىنىن قولىنا العانىنا التى جىل. وسىعان وراي Dalanews.kz ساياساتتانۋشى قازىبەك مايگەلدينوۆتىڭ پىكىرىن سۇرادى.
ساراپشىنىڭ پىكىرىنشە، مەملەكەت باسشىسى جۇمىسقا كىرىسكەلى ساياسي ترانسفورماسيا باعىتىنداعى رەفورمالار قولعا الىنعان.
"2019 جىلى 19 ناۋرىز كۇنى، وسىدان تۋرا 6 جىل بۇرىن ەلىمىزدەگى ساياسي ءترانزيتتىڭ باستى اكتىسى ءوتتى دەۋگە بولادى. 2019 جىلى قاسىم-جومارت كەمەل ۇلى توقايەۆ بيلىككە كەلگەلى اۋەلى ساياسي ترانسفورماسيا جاساۋ، ياعني ساياسي ترانسفورماسيا باعىتىنداعى رەفورمالار قولعا الىندى. بۇگىندە ول توقايەۆتىڭ ساياسي رەفورمالارىنىڭ پاكەتتەرى اتىمەن بەلگىلى. جالپى ساياسي رەفورمالارىنىڭ بەس پاكەتى قابىلداندى. ول جالعاساتىن شىعار. ويتكەنى جۋىردا وتكەن ۇلتتىق قۇرىلتايدىڭ IV وتىرىسىندا پرەزيدەنتىمىز بۇل ساياسي ترانسفورماسيانىڭ الداعى ۋاقىتتا دا، اسىرەسە، ىشكى ساياساتتى وڭتايلاندىرۋ باعىتىندا جالعاساتىنىن ايتقان بولاتىن"، - دەدى ساراپشى.
ساياساتتانۋشى التى جىلداعى باستى وزگەرىستەردى اتادى.
"2019 جىلدان باستاپ ەلدەگى ەڭ باستى وزگەرىس بۇل، ارينە، بيلىك قۇرىلىمدارى اراسىنداعى تەپە-تەڭدىكتى قايتا قاراۋ. ياعني شەشىم قابىلداۋ ورتالىقتارى مەن بيلىك تەتىكتەرىنىڭ جاڭا اراقاتىناسى ورنادى. ەڭ بىرىنشىدەن، بۇل - پرەزيدەنتتىڭ وكىلەتتىلىگىن شەكتەۋ. جەتى جىلدىق، ءبىر رەتتىك مەرزىممەن. ارينە، اقش-تاعىداي ءتورت جىلدىق ەتۋگە بولاتىن ەدى. ءبىراق قازىرگى تاڭداعى ساياسي احۋالدى ەسكەرە وتىرىپ، ەلىمىز دامۋشى مەملەكەتتەر قاتارىندا بولعاندىقتان، دەموكراتيالىق ينستيتۋتتار قالىپتاسۋى ءالى دە جالعاسىپ جاتقاننان كەيىن كەز كەلگەن رەفورمانى نەمەسە وزگەرىستى جۇزەگە اسىرۋ ءۇشىن جەتى جىلدىق مەرزىم قاجەت دەگەن شەشىم قابىلداندى. ودان بولەك ەلىمىزدەگى سايلاۋ جۇيەسى وزگەرتىلدى. بۇل دا بولسا ەلدەگى جاڭا ساياسي كۇشتەر پايدا بولىپ، شەشىم قابىلداۋ ورتالىقتارىنىڭ ءارتاراپتاندىرىلۋىنا باستى قادام. ناتيجەسىندە بىزدە ءبىر مانداتتى وكرۋگ ارقىلى دەپۋتاتتىققا سايلانۋعا مۇمكىندىك بولدى"، - دەدى ول.
قازىبەك مايگەلدينوۆ وزگەرىستەردىڭ ءبىرى رەتىندە ەلدە كوپپارتيالى جۇيە پايدا بولۋىنا جاسالعان العىشارتتاردى اتادى.
"مەجەنى ءتۇسىرۋ ارقىلى جاڭا ساياسي پارتيالاردىڭ، ساياسي كوپتۇرلىلىكتىڭ جۇزەگە اسۋىنا مۇمكىندىك جاسالدى. قازىرگى تاڭدا جاڭا ساياسي پارتيالاردىڭ ىشىنەن Respublica، بايتاق پارتيالارىن ايتۋعا بولادى، ىنتىماق پارتياسى دا تىركەۋدەن وتۋگە تىرىسىپ جاتىر. بۇل - جاقسى ءۇردىس. ويتكەنى ەلدە نەعۇرلىم ءتۇرلى-تۇرلى ساياسي كوزقاراستار، ساياسي كۇشتەر بولسا، سوعۇرلىم باسەكەلەستىك تە ارتادى"، - دەدى ساراپشى.
ساياساتتانۋشىنىڭ سوزىنشە، مەملەكەتتىك اپپاراتتىڭ جاۋاپكەرشىلىگىن ارتتىرۋ - پرەزيدەنتتىڭ كۇندەلىكتى ايتىپ جۇرگەن كۇن تارتىبىندەگى باستى قاعيداتى.
"جاۋاپكەرشىلىك بولماي، كەز كەلگەن رەفورمانى، كەز كەلگەن باستامانى جۇزەگە اسىرۋ قيىن. بىزدە اكىمدەردى حالىق سۇراعانداي، حالىق تالابىنا ساي تىكەلەي سايلاۋ باستالدى. الدىمەن اۋىل اكىمدەرىن تىكەلەي سايلادى. بىلتىر اۋدان اكىمدەرىن جانە رەسپۋبليكالىق دەڭگەيىندەگى قالا اكىمدەرىن سايلادى. الداعى ۋاقىتتا بالكىم وبلىس اكىمدەرىن دە تىكەلەي سايلاۋعا كەلەتىن سياقتىمىز. بۇل دا وتە جاقسى ءۇردىس"، - دەپ باعالادى ول.
ساراپشىنىڭ پايىمىنشا، ەلىمىزدىڭ ءبىرتۇتاستىعىن، تۇراقتىلىعىن ساقتاۋ ءۇشىن قانشا دەگەنمەن دە بيلىكتىڭ، شەشىم قابىلداۋ ورتالىعىنىڭ مىقتىلىعى كەرەك.
"دەگەنمەن دە سۋپەر پرەزيدەنتتىكتەن كەتتىك. سۋپەر پرەزيدەنتتىكتەن ارىلۋ ءۇشىن كونستيتۋسيادا بارلىق وزگەرىس جاسالدى. ەندى الدا جەرگىلىكتى ءوزىن-وزى باسقارۋ، ازاماتتىق قوعام جانە بيلىك پەن قوعام اراسىنداعى كوپىردىڭ ودان ءارى قاراي ۇلعايۋىن، ازاماتتاردىڭ شەشىم قابىلداۋ ۇردىسىنە تىكەلەي قاتىسۋعا مۇمكىندىك الۋىن كۇتەمىز. مەنىڭ ويىمشا، التى جىلداعى باستى ساياسي رەفورمالاردىڭ ناتيجەسى وسىنداي بولدى.
ەكونوميكالىق، الەۋمەتتىك باعىتتاردا الەۋمەتتىك، بيۋدجەت، سالىق كودەكستەرى دە بار. ءبىرى مەملەكەتتىك بيۋدجەتتى دۇرىس پايدالانۋ ءۇشىن بولسا، ەندى ءبىرى الەۋمەتتىك تولەمدەردى جوعارىلاتۋ ماقساتىندا. پرەزيدەنت ايتقانداي، ءبىز - الەۋمەتتىك مەملەكەتپىز. الەۋمەتتىك تەڭسىزدىكتى جويۋ - باستى ماقساتىمىز. بۇل باعىتتا دا ساياسي رەفورمالارمەن قاتار جاسالىپ جاتقان ارەكەتتەر بار.
بيۋروكراتيانى جويۋداعى، مەملەكەتتىك باسقارۋعا جاساندى ينتەللەكتىنى ەنگىزۋدەگى ماقسات - زامان تالابىنا ساي، بۇگىنگى تاڭداعى تيىمدىلىگى جوعارى مەملەكەتتىك اپپارات قۇرۋ. ويتكەنى وسى باعىت دۇرىس جولعا قويىلسا، وندا ەكونوميكالىق، الەۋمەتتىك رەفورمالاردىڭ جۇزەگە اسۋ ساپاسى دا ارتادى"، - دەپ تۇيىندەدى مايگەلدينوۆ.
Dalanews.kz انىقتاماسى: قاسىم-جومارت توقايەۆ 2019 جىلعى 20 ناۋرىزدا قازاقستان رەسپۋبليكاسىنىڭ پرەزيدەنتى رەتىندە انت قابىلدادى.
2019 جىلى 9 ماۋسىمدا وتكەن كەزەكتەن تىس پرەزيدەنت سايلاۋىندا 70،96 پايىز داۋىس جيناپ، قازاقستان رەسپۋبليكاسىنىڭ پرەزيدەنتى بولىپ سايلاندى. 2019 جىلى 12 ماۋسىمدا ق ر كونستيتۋسياسىنىڭ 42-بابىنا سايكەس انت بەرىپ، رەسمي تۇردە سايلانعان پرەزيدەنت رەتىندە مەملەكەت باسشىسىنىڭ لاۋازىمىنا كىرىستى.
قاسىم-جومارت توقايەۆ 2022 جىلعى 20 قاراشادا وتكەن كەزەكتەن تىس پرەزيدەنت سايلاۋىندا 81،31% داۋىس جيناپ، جەڭىسكە جەتتى. 2022 جىلى 26 قاراشادا قازاقستان رەسپۋبليكاسى پرەزيدەنتىن سالتاناتتى ۇلىقتاۋ ءراسىمى ءوتتى.
ەسكە سالايىق، بۇعان دەيىن پرەمەر-مينيستر ولجاس بەكتەنوۆ قاسىم-جومارت توقايەۆ تۋرالى ماقالا جازدى.
