Prezident Toqaev Úkimettiń keńeitilgen otyrysy barysynda Premer-ministr Oljas Bektenovtiń jumysyna baǵa berip, ekonomikanyń qazirgi jai-kúiine toqtaldy, dep habarlaidy Dalanews.kz.
Memleket basshysynyń aitýynsha, syrtqy jáne ishki ahýaldaǵy «jaǵymsyz jaittar» ekonomikaǵa tikelei yqpal etken. Soǵan qaramastan, bilik jaǵdaidy kúrdelendirmei, baqylaýda ustaýǵa tyrysypty.
«Jalpy nátije jaman emes. Ótken jyldy tolyq kórsetkishtermen aiaqtadyq, – dedi Toqaev. – Alaida jaibaraqat otyrýǵa bolmaidy. Sheshimin kútken túitkilder áli de jetkilikti. Bul máselelerdi sarapshylar da, buqara da kórip, bilip otyr. Ekonomikamyz áli kúnge deiin ártaraptandyrylmaǵan jáne Ulttyq qor qarjysyna tym táýeldi".
Prezidenttiń sózinshe, Ulttyq qor – áleýmettik ekonomikanyń bir tarmaǵy retinde elge úlken septigin tigizip keledi. Degenmen Memleket basshysy biznes qaýymdastyqtyń investitsiialyq belsendiligin jetkilikti deńgeide emes dep esepteidi.
«Biznestiń investitsiialyq belsendiligi áli de tómen. Bul olqylyqtardy biyldan qaldyrmai joiý kerek», – dedi Toqaev.
Óz kezeginde Bektenov Ulttyq qordyń aqshasyn paidalaný tártibine ózgeris engenin atap ótti.
"Ulttyq qordyń qarajaty, siz tapsyrǵanyńyzdai, tek iri infraqurylymdyq obektilerdi salý úshin ǵana suralatyn bolady.Sonymen qatar biz memlekettik shyǵystardyń tiimdiligin arttyryp, biýdjet tártibin nyǵaitamyz", - dedi ol Memleket basshysyna qarata.
Sarapshylardyń boljamynsha, Qazaqstan ekonomikasynyń turaqty damýy úshin shikizattyq kiriske táýeldilikti azaityp, jeke sektordyń úlesin arttyrý mańyzdy. Al Úkimet bul baǵyttaǵy is-qimyldy jaqyn arada naqtylai túsýdi josparlap otyr.
