Toqaev qala jurtshylyǵymen kezdesýinde qańtar oqiǵalary jaily qasaqana áreket etken qaraqshylar tobynyń memlekettigimizdiń tuǵyryn shaiqaltýǵa tyrysqanyn, eldegi turaqtylyqtyń tamyryna balta shapqysy kelgenin aitty.
Ol sonymen qosa beibit sherýlerdiń sebebi – bir bólek, al memlekettik tóńkeris jasaǵysy kelgenderdiń maqsaty – múlde basqa bolǵanyn sol sebepti máseleniń basyn ashyp alý qajet ekenin jetkizdi.
Prezident qańtar oqiǵasynyń astaryna úńilsek, onyń sebepteri aiqyn kórinetinin aitady. Ol munyń sebebin, elimizde uzaq ýaqyt áleýmettik ádildik nazardan tys qalýymen jáne memleket pen qoǵamnyń arasy alshaqtap ketkenimen túsindiredi.
Toqaev jyldar boiy sheshilmegen áleýmettik-ekonomikalyq máselelerden jurt ábden qajyǵanyn aitady.
Alaida Toqaev qylmyskerlerdiń kózdegeni basqa bolǵanyn, olar beibit sherýdi jappai tártipsizdikke ainaldyrǵysy kelgenin túsindiredi. Sózinshe, aldyn-ala ázirlegen arandatýshylar, buzaqylar, tipti qaraqshylardy paidalanǵan.
"Sonyń kesirinen Almatydaǵy jaǵdai kúrt nasharlady, tipti, baqylaýdan shyqty. Qylmyskerler ákimshilik ǵimarattardy basyp aldy. Kóshelerdi jaýyp, jolynda kezdeskenniń bárin qiratty, tonady. Qysqasy, oilaryna ne kelse, sony istedi. Biraq, qandai jaǵdai bolsyn, azamattarymyz, eń bastysy, Almatynyń asqaq rýhyn qulatqan joq. Qala turǵyndary judyryqtai jumyldy, súiikti qalasyn qorǵap qalý úshin birikti. Árine, sodyrlardyń mundaidy kútpegeni aidan anyq", - dedi prezident.
Elimizdiń altyn besigi – Almatyny qiratyp jatqany osy qalanyń perzenti retinde meniń de janyma batty, deidi Toqaev.
Biraq sol sátte abdyrap, ýaqyt uttyrýǵa esh qaqymyz bolmaǵanyn, onda ábden dandaisyp ketken qaraqshylar qalamyzdy kúl-talqan qylar edi.
Memleket basshysy el taǵdyry synǵa túsken jaýapty sátte halqymyzdyń myzǵymas birligi men qaitpas qaisarlyǵyn tanytqanyn atap ótti. Memlekettigimizdi saqtap qalý úshin biz qandai táýekelge de baratynymyzdy aiqyn kórsettik, deidi ol.
[caption id="attachment_83310" align="aligncenter" width="2560"]
"Sol qiyn kúnderde búkil Qazaqstan halqy almatylyqtardyń tileýin tiledi. Ókinishke qarai, qazir keibireýler qylmystyq áreketti halyq kóterilisi dep aqtaýǵa tyrysyp júr.
Taǵy da aitamyn: halyqtyń beibit sherýi men qaraqshylar jasaǵan qandy qylmystyń arasyn ajyrata bilý kerek. Biz jedel jáne batyl áreket jasaǵannyń arqasynda el ishinde dereý tártip ornattyq. Qabyldaǵan sheshimderimiz jáne is-áreketimiz búkil dúnie júzinde túsinistikpen moiyndaldy, tipti, qoldaý tapty", - dep túsindiredi prezident.
"Ýaqyt – emshi" degen halyq danalyǵyn sózine tiek etken Toqaev qasiretti kúnder alystaǵan saiyn birtindep kómeski tarta beretini anyq ekenin aitady.
Qarýly kúshterdiń qalai oiran salǵany da esten shyǵýy múmkin ekenin aitqan ol, el ishine jik salǵysy keletin arandatýshylardyń jeteginde ketpeýimiz kerek dep eskertedi.
Toqaev sonymen qatar kóshege shyǵyp, buzaqylyq jasaǵan adamdardy dáriptep, qoldan qaharman jasaýǵa bolmaitynyn taǵy bir qaitara eske saldy. Qastańdyq uiymdastyrǵan qaraqshylardyń qylmysyn aqtaýǵa jol berilmeidi. Olardyń bári laiyqty jazasyn alady, deidi ol.
Qańtar oqiǵalaryna qatysty isti bolǵan azamattardy aqtaý úshin qabyldanǵan Raqymshylyq týraly zań jóninde aitqan prezident, muny adamgershilik turǵydan durys qadam dep ataǵan.
"Biraq, qylmyskerlerdiń qolshoqpary bolǵan, arandap qalǵan jandar da bar. Men aýyr qylmys jasamaǵan osyndai azamattarǵa keshirimmen qaraǵan jón dep sheshtim. Osyǵan orai, Raqymshylyq týraly zań qabyldandy. Bul – adamgershilik turǵydan durys qadam. Óitkeni, keshirim – izgiliktiń belgisi. Qajetti zańdyq rásimder keiin raqymshylyq jasalǵan adamdar bosatylyp, otbasyna oralady. Budan bylai mundai qasiret qaitalanbaidy dep senemin. Sol úshin biz qoldan kelgenniń bárin jasaimyz. Qaiǵyly kúnderde qaza bolǵan jandardyń jaqyndaryna taǵy da kóńil aitamyn", - dedi memleket basshysy.
Sóziniń sońynda Toqaev syn saǵatta antqa adal bolǵan quqyq qorǵaý jáne kúshtik qurylymdardyń qyzmetkerlerin erekshe atap ótken. Sondai-aq ol qoǵamdyq tártipti qalpyna keltirýge qala turǵyndary da atsalysqanyn jasyrmaidy.
"Osyndai janashyr azamattardyń bárine rizashylyǵymdy bildiremin. "Qańtar qasireti" bizge synaq qana emes, úlken sabaq boldy. Tynyshtyq pen turaqtylyqtyń qadirin jurtymyz jete túsindi. Al, qoǵamǵa iritki salýdy kózdegen qaraqshylardyń, lańkesterdiń maqsaty oryndalǵan joq. Kerisinshe, halqymyzdyń birligi nyǵaia tústi. Uiysyp, jan-jaqty jańǵyrý jolyna qadam basty", - dedi memleket basshysy.
Derekkóz: Stan.kz
