Prezident Polpharma kompaniiasy baqylaýshylar keńesiniń tóraǵasy Eji Starakpen kezdesti. Kezdesý barysynda Memleket basshysy erekshe syi aldy, - dep habarlaidy Dalanews.kz.
Sheteldik investorlar keńesiniń otyrysy aiasynda Prezident Qasym-Jomart Toqaev Polpharma kompaniiasy baqylaýshylar keńesiniń tóraǵasy Eji Starakty qabyldady.
Kezdesýde álemdegi jetekshi farmatsevtikalyq kompaniianyń Qazaqstan men Ortalyq Aziiadaǵy qyzmetin keńeitý máseleleri talqylandy.
Memleket basshysyna kompaniianyń sapany baqylaý zerthanasy men ǵylymi-zertteý synaq ortalyǵynyń qurylysy aiaqtalǵany jóninde málimet berildi. Sondai-aq taiaý arada jańa dárilik preparattar óndirisin iske qosý jospary tanystyryldy.
Qasym-Jomart Toqaev Qazaqstannyń farmatsevtika indýstriiasyndaǵy ǵylymi-zertteý áleýetin damytý jáne oqý baǵdarlamalaryn engizý mańyzdy ekenin atap ótti. Memleket basshysy kóktemgi sý tasqyny kezinde zardap shekken óńirlerge qajetti dári-dármekterdi jedel jetkizip bergeni úshin polshalyq investorǵa alǵys aitty.
Kezdesý sońynda Eji Starak Qasym-Jomart Toqaevqa eki kitap syiǵa tartty. Onyń birinshisi Polpharma kompaniiasynyń demeýshiligimen túsirilip jatqan derekti filmge arnalǵan. Bul filmde Beket ata, Qoja Ahmet Iasaýi, Arystan bab keseneleri, Tańbaly petroglifteri men Botai qonysy sekildi Qazaqstannyń kieli jerleri taspalanǵan.
Ekinshi kitap – qazaqtyń belgili jazýshysy, Polshany basqynshylardan azat etýge qatysqan maidanger Kemel Toqaev týraly ǵumyrbaiandyq jinaq. Bul basylym Polsha-Qazaqstan tarihy komissiiasynyń qoldaýymen ázirlendi.
