Oblys ákimi aldymen, Kóksáiek aýyldyq okrýgindegi «Keremet agro Group» aýylsharýashylyq óndiristik kooperativiniń jumysymen tanysty. Kooperativ 2017 jyly 40 ga jerge qarqyndy alma baýyn ekken. Osy jumystar úshin 503 mln. teńge kóleminde investitsiia tartqan. Sharýashylyqqa qajetti tehnikany "Yrys" MQU arkyly 43 mln. 100 myń teńgege lizing boiynsha qarjylandyrǵan. Aýylsharýashylyq óndiristik kooperativiniń tóraǵasy – Ozyqbai Abzal Meirambekuly. «Gala», «Golden delishes», «Aidared» jáne «Red delishes» atty almanyń suryptary egilgen baýda 87500 dana túp aǵash bar. Kooperativte 50 adam turaqty jumys isteidi. Ortasha ailyq jalaqysy – 90 myń teńge.
Munan keiin oblys ákimi Tasaryq aýylynda ornalasqan jeke kásipker S.Tanabaevtyń júzim sharýashylyǵynda boldy. Kásipker tastaq jerdi tiimdi paidalanyp, 2016 jyly jańa tehnologiiamen 10 gektarǵa júzim ekken. Al, 2017 jyly qosymsha 10 gektar jerge 16 myń túp kóshet otyrǵyzdy. Sharýashylyqqa qarasty 20 gektarǵa jalpy sany 32 myń túp «Taifi-Rozovyi» júzimi egilgen. Beton tireýishter ornatyp, tamshylatyp sýarý júiesin qoldanǵan. Kóshetterdi Saryaǵash aýdanynan aldyrǵan. Jobanyń jalpy investitsiialyq quny – 50 mln. teńge. Bul qarjynyń teń jartysyn «Damý» baǵdarlamasy aiasynda «Ońtústik» aimaqtyq investitsiia ortalyǵy bólgen. Qojalyq basshysy 10 gektar jerdi satyp alsa, 10 gektar jerdi memleketten 49 jylǵa jalǵa alǵan. Júzim alqabynyń ár gektaryna memleket tarapynan 750 myń teńgeden sýbsidiia berildi. Júzimbaq biyl alǵashqy ónimin bere bastaidy. Gektaryna 35-40 tonnadan ónim beredi dep kútilýde. Búginde júzimbaqta 10 adam turaqty eńbek etip jatyr. Jalaqylary ortasha eseppen 50 myń teńgeni quraidy. Al, maýsymdyq jiyn-terim mezgilinde munda 20-ǵa jýyq adam jumysqa tartylady. Sharýa qojalyǵy aldaǵy jyldary júzimdi qaita óńdeý isin qolǵa alyp, júzimbaqqa jaqyn mańnan kókónis saqtaý qoimasynyń qurylysyn bastamaq.
Isker sharýalardyń jumysymen tanysqan óńir basshysy jemis-jidekti óńdeý máselesin qolǵa alý kerektigin aitty.
– Eýropa elderinde 10-15 gektar jeri bar sharýalar tek daiyn ónimdi satyp qoimai, jemis-jidek pen kókónisti óńdeidi. Osy arqyly tabys molyraq túsedi. Máselen, alma, júzim saqtaityn qoimalar men ony óńdep túrli sýsyndar shyǵaratyn kásiporyn salsańyzdar tiimdirek bolady. Jalpy, Tólebi aýdanynda jumystar atqarylyp jatyr. Byltyr kópqabatty 8 úi turǵyndarǵa berildi. Bul – aýdan tarihynda buryn bolmaǵan oqiǵa. Aýdandaǵy eldi mekenderdiń 94 paiyzy aýyz sýmen qamtyldy. 14 eldi mekenge, iaǵni, 5000 úige gaz berildi. Gazdandyrý jumystary aldaǵy ýaqytta da jalǵasyn tabady. Joldar salynyp jatyr. Kanaldar tazalanyp, sýarmaly jer kóbeidi. Osy baǵyttan ainymai, kásipkerlikti, aýyl sharýashylyǵyn jandandyra túsý kerek, – dedi Janseii Túimebaev.
