«Tóle bi» kinotaptamasy kóne tarihty jańǵyrtty
Aldaǵy ýaqytta osy týyndylardyń arasynan «Tóle bi» kinotaptamasy jurtshylyqqa jol tartpaqshy. 1726 jyly Ordabasy taýynda qazaqtyń úsh júziniń igi jaqsylary bas qosyp, jońǵar basqynshylyǵyna qarsy kúreske halyqty jumyldyrý jaiyn úlken basqosý bolǵanyn tarihtan jaqsy bilemiz. Bul jiyn – qazaq eli tarihyndaǵy asa kúrdeli kezeńde halyqtyń rýhyn kóterip, ulttyq namystyń otyn jaqqan, júrekke jiger, boiǵa qýat berip, aldaǵy uly shaiqastarǵa birtutas el bolyp attanýdyń taǵdyryn sheshken asa mańyzdy oqiǵa sanalady.
«Saq» kinostýdiia ujymy osy oqiǵaǵa orai oblys ákimi Janseiit Qanseiitulymen aqyldasa otyryp, 10 seriiadan turatyn «Tóle bi» teleserialyn túsirýdi qolǵa alǵan-dy. Týyndynyń stsenariiin jazýshy, jýrnalist Shoibek Orynbai men budan buryn da birneshe animatsiialyq filmniń stsenarii avtory Baqytjan Quljabai jazǵan. Olar Marhabat Baiǵut, Mombek Ábdákim, Sársenbi Dáýituly men Jambyl Artyqbaevtyń «Tóle bi» týraly eńbekterin basshylyqqa alǵan. Teleserialdyń tarihi keńesshisi – professor, tarihshy Jambyl Artyqbaev, ádebi-kórkemdik jetekshisi – kinorejisser, Qazaqstannyń eńbek sińirgen qairatkeri, QR Memlekettik syilyǵynyń iegeri Satybaldy Narymbetov.
Oblystyq biýdjetten filmniń ár seriiasyna 15 mln. teńgeden, barlyǵy 150 mln. teńge bólingen bolatyn. B.Dáýrenbekovtiń málimdeýinshe, bas keiipkerdiń 6 jastan 10 jasqa deiingi kezeńin – Mansur Dáýletuly, 10 jastan jigit shaǵyna deiin – Ersultan Sirgebai, jigit shaǵyn M.Áýezov atyndaǵy OQMÝ-dyń «Pedagogika jáne mádeniet» fakýltetiniń stýdenti Abzal Tólen, egde jastaǵy Tóle bidi Saǵyndyq Jumadilov somdaidy. Saǵyndyq Jumadilov pen «Tamasha» oiyn-saýyq otaýynyń belgili akteri Saǵadildá Úsibáli ǵana syrttan shaqyrylypty. Túsirilim Tólebi aýdanynyń Qasqasý eldi mekenindegi taý bókterinen bastalyp, Túrkistanda, Boraldaida jáne Tashkent qalasynda jalǵasqan.
Teleserial jergilikti jáne respýblikalyq arnalardan kórsetiletin bolady.
