الداعى ۋاقىتتا وسى تۋىندىلاردىڭ اراسىنان «تولە بي» كينوتاپتاماسى جۇرتشىلىققا جول تارتپاقشى. 1726 جىلى ورداباسى تاۋىندا قازاقتىڭ ءۇش ءجۇزىنىڭ يگى جاقسىلارى باس قوسىپ، جوڭعار باسقىنشىلىعىنا قارسى كۇرەسكە حالىقتى جۇمىلدىرۋ جايىن ۇلكەن باسقوسۋ بولعانىن تاريحتان جاقسى بىلەمىز. بۇل جيىن – قازاق ەلى تاريحىنداعى اسا كۇردەلى كەزەڭدە حالىقتىڭ رۋحىن كوتەرىپ، ۇلتتىق نامىستىڭ وتىن جاققان، جۇرەككە جىگەر، بويعا قۋات بەرىپ، الداعى ۇلى شايقاستارعا ءبىرتۇتاس ەل بولىپ اتتانۋدىڭ تاعدىرىن شەشكەن اسا ماڭىزدى وقيعا سانالادى.
«ساق» كينوستۋديا ۇجىمى وسى وقيعاعا وراي وبلىس اكىمى جانسەيىت قانسەيىتۇلىمەن اقىلداسا وتىرىپ، 10 سەريادان تۇراتىن «تولە بي» تەلەسەريالىن ءتۇسىرۋدى قولعا العان-دى. تۋىندىنىڭ سەنارييىن جازۋشى، جۋرناليست شويبەك ورىنباي مەن بۇدان بۇرىن دا بىرنەشە انيماسيالىق ءفيلمنىڭ سەناريي اۆتورى باقىتجان قۇلجاباي جازعان. ولار مارحابات بايعۇت، مومبەك ابداكىم، سارسەنبى ءداۋىت ۇلى مەن جامبىل ارتىقبايەۆتىڭ «تولە بي» تۋرالى ەڭبەكتەرىن باسشىلىققا العان. تەلەسەريالدىڭ تاريحي كەڭەسشىسى – پروفەسسور، تاريحشى جامبىل ارتىقبايەۆ، ادەبي-كوركەمدىك جەتەكشىسى – كينورەجيسسەر، قازاقستاننىڭ ەڭبەك سىڭىرگەن قايراتكەرى، ق ر مەملەكەتتىك سىيلىعىنىڭ يەگەرى ساتىبالدى نارىمبەتوۆ.
وبلىستىق بيۋدجەتتەن ءفيلمنىڭ ءار سەرياسىنا 15 ملن. تەڭگەدەن، بارلىعى 150 ملن. تەڭگە بولىنگەن بولاتىن. ب.داۋرەنبەكوۆتىڭ مالىمدەۋىنشە، باس كەيىپكەردىڭ 6 جاستان 10 جاسقا دەيىنگى كەزەڭىن – مانسۇر داۋلەت ۇلى، 10 جاستان جىگىت شاعىنا دەيىن – ەرسۇلتان سىرگەباي، جىگىت شاعىن م.اۋەزوۆ اتىنداعى وقمۋ-دىڭ «پەداگوگيكا جانە مادەنيەت» فاكۋلتەتىنىڭ ستۋدەنتى ابزال تولەن، ەگدە جاستاعى تولە ءبيدى ساعىندىق ءجۇمادىلوۆ سومدايدى. ساعىندىق ءجۇمادىلوۆ پەن «تاماشا» ويىن-ساۋىق وتاۋىنىڭ بەلگىلى اكتەرى ءساعادىلدا ءۇسىبالى عانا سىرتتان شاقىرىلىپتى. ءتۇسىرىلىم تولەبي اۋدانىنىڭ قاسقاسۋ ەلدى مەكەنىندەگى تاۋ بوكتەرىنەن باستالىپ، تۇركىستاندا، بورالدايدا جانە تاشكەنت قالاسىندا جالعاسقان.
تەلەسەريال جەرگىلىكتى جانە رەسپۋبليكالىق ارنالاردان كورسەتىلەتىن بولادى.
