Tóle bi aýdanyna jańa ákim taǵaiyndaldy
Búgin Túrkistan oblysynyń Tóle bi aýdanyna jańadan ákim taǵaiyndaldy. QR Prezidenti Ákimshiliginiń kelisimi jáne aýdandyq máslihattyń kelisimi boiynsha oblys ákimi Janseiit Túimebaev bul qyzmetke Baýyrjan Omarbekovty taǵaiyndady.
Ákimdi aýdan aktivine arnaiy tanystyrǵan aimaq basshysy aldaǵy jumysyna sáttilik tilei otyryp, Memleket basshysy bekitken baǵdarlamalardyń sapaly túrde júzege asyrýǵa jáne aýdannyń áleýmettik-ekonomikalyq damýy men turǵyndardyń onyń ishinde jastardyń jumysqa ornalasýyn basty nazarda ustaý qajettiligin aitty. Sonymen birge, aýdannyń damýyna óz úlesin qosqan burynǵy ákim Buharbai Parmanovqa alǵysyn bildirip, aldaǵy qyzmetine sáttilik tiledi.
– Aýdanda turǵyn úimen qamtý, aýyl sharýashylyǵyn jáne týrizmdi damytý boiynsha júieli jumystar júrgizilýde. Endi jańa ákim osy baǵyttaǵy jumystardy jedeldetip, sapaly túrde atqarý qajet. Sonymen qosa barlyq salany tsifrlandyrý júiesine kóshirýdi basty nazarǵa alǵan jón. Aqparattyq tehnologiialar qaryshtap damyp bara jatqan myna zamanda IT salasyn damytpasaq, damyǵan 30 eldiń qatarynan kóriný qiyn. Óitkeni, órkenietti elderdiń barlyǵy osy tsifrly júiege kóship, ónerkásibiniń damýyn jáne halqynyń ál-aýqatyn jyldan-jylǵa jaqsartyp keledi. Bul jumysty úilestirýde jańa taǵaiyndalǵan ákimniń tájiribesi men biliktiligi jetedi dep oilaimyn. Budan bólek, turǵyndardy aýyz sý jáne kógildir otynmen qamtý jáne eńbek resýrstaryn rettep, halyqty jumyspen qamtý jumystaryn kúsheitýdi tapsyramyn, – dedi ákim.
B.Omarbekov 1983 jyly týylǵan, bilimi joǵary, mamandyǵy boiynsha ekonomist. Eńbek jolyn 2005 jyly «Qazkommertsbank» AQ Shymkent filialy bólshek biznesin damytý sektorynyń klienttermen jumys júrgizý menedjeri bolyp bastaǵan. 2006-2015 jyldary aralyǵynda «Qazkommertsbank» AQ Shymkent filialy № 814 operatsiialyq bóliminiń tutyný nesielerin satý bóliminiń menedjeri, «Bank Týran Alem» AQ OQF nesie jelisi sektorynyń meńgerýshisi, «Alians Bank» AQ direktorynyń bólshek biznesi boiynsha orynbasary, «Kásipkerlikke qyzmet kórsetý ortalyǵy» JShS-niń direktory qyzmetterin atqarǵan.
Al 2015-2016 jyldary aralyǵynda Ońtústik Qazaqstan oblysy kásipkerlik, indýstriialdy-innovatsiialyq damý jáne týrizm basqarmasy basshysynyń orynbasary, Ońtústik Qazaqstan oblysy ákiminiń keńesshisi qyzmetin atqarǵan. 2016 jyldyń shilde aiynan bastap Ordabasy aýdany ákiminiń orynbasary laýazymynda eńbek etip kelgen.
Túrkistan oblysy ákiminiń baspasóz qyzmeti
