“Ókinishke orai, búginde Tokio Olimpiadasyndaǵy keibir sportshylarymyzdyń sátsizdigine kópshilik jaǵymsyz pikirler men tym ádiletsiz syn aityp jatyr.
Onyń ishinde buǵan deiingi jarystarda elimizdiń atyn tórtkúl dúniege tanytyp júrgen tanymal atletterimiz de aty atalýda”, – deidi ministr.
Óz sózinde ministr Rypakova men Levittiń oiyndaryn atap ótti.
“2016 jyly Rio-de-Janeiro Olimpiadasynda Vasilii Levittiń ringtegi ónerine búkil elimiz tamsandy, oǵan kórsetilgen ádiletsizdikke birge jandary aýyrdy.
Osy joly Vasilii jeńildi, biraq onyń osy bes jyl ishinde elimiz úshin daiyndalyp, kezekti olimpiadalyq tsiklden ótip, ringke qaita shyǵýynyń ózi qurmetteýge turarlyq sheshim dep sanaimyn.
Olga Rypakovanyń da sátsizdigi men onyń kásibi karerasy aiaqtaldy degen aqparat kóńilge tipti qaiaý túsiredi.
Olga búkil sanaly ǵumyryn otandyq sport jolyna arnap, elimizdiń atyn talai márte dúbirli dodalarda asqaqtatqan birden bir jeńil atlet. Ol 36 jasynda óziniń tórtinshi Olimpiadasyna qatysyp, elimizdiń namysyn kezekti ret qorǵaýǵa sheshim qabyldady.
Olar úlken sporttaǵy karerasyn aiaqtaǵanymen aldaǵy ýaqytta ózderiniń izin basar shákirt tárbieleýde úlken eńbek etedi dep senemin”, – dep qosty ol.
Buǵan qosa, ol bul sportshylardyń jetken jetistikterin umytpaýǵa shaqyrdy.
“Sondyqtan qandai jaǵdaida da uly sportshylarymyzdyń jetistikteri men jeńisterin biz eshqashan umytpaýymyz kerek. Qiyn sátterde qoldaý kórsetý arqyly ǵana biz olarǵa senim uialatyp, keler kúnderdiń jeńisterinen úmit ete alamyz. Biz úshin bizdiń sportshylardyń barlyǵy da naǵyz chempiondar!” – dedi Balaeva.
