«QazAqparat» HAA tilshisine bergen suhbatynda qazaqstandyq saiasattanýshy Erlan Sairov búgingi kadrlyq aýys-túiisterge pikir bildirdi.
– Kadrlardy almastyrý – ol zańdy úderis. Buryndary oblys ákimi retinde óńirlerdiń adamdaryn taǵaiyndaityn. Ásirese, bundai úrdis 2010-shy jyldardyń bysynda baiqalǵan edi. Degenmen de, biliktiń ortalyq organdaryna jumys tájiribesi bar adamdar da kerek. Sebebi ákimderge bilim berý, ekonomika salalaryndaǵy kóp baǵdarlamalardy úilestirý qajet ekeni belgili. Qazirgi kezde óńirlerde biznesti damytý boiynsha baǵdarlama júzege asyrylýda, osy rette qomaqty somada qarajat bólinýde. Osyndai jaǵdaida respýblikalyq deńgeide jumys tájiribesi bar qyzmetkerler kerek shyǵar, – dep toqtaldy ol. Sonymen qatar saiasattanýshy sońǵy jyldary E. Toǵjanov ideologiialyq baǵytta jumys istegenin eske salyp ótti.
– Negizi Eraly Toǵjanov – ol tájiribeli menedjer. Ol jumys istegen kezeńde Qazaqstan halqy Assambleiasy tiimdi organǵa ainaldy, iaǵni QHA ultaralyq qatynastar salasyndaǵy máselelerdi retteýge qaýqarly. Sońǵy 10 jylda bizde bul salada teris úrdister, qoǵamdyq tártipti buzýdyń asqynǵan jaǵdailary oryn alǵan joq, – dep túsindirdi Sairov.
Budan bólek, ol Eraly Toǵjanovtyń eleýli uiymdastyrýshylyq qabiletterine de toqtalyp ótti. «Mańǵystaý óńiri erekshe aimaqtardyń biri. Meniń oiymsha, osy óńirde gýmanitarlyq salada jumys istep, diplomatiialyq qabilettiń múmkindikterin paidalaný kerek, – dep paiymdaidy saiasattanýshy.
Atap aitqanda, Toǵjanovtyń atqarǵan qyzmetteriniń qatary qalyń, onyń ishinde aitarlyqtai jaýapty laýazymdardy da atqardy. Ol E.A. Bóketov atyndaǵy Qaraǵandy memlekettik ýniversitetiniń Memleket jáne quqyq teoriiasy men tarihy kafedrasynda oqytýshy, QR Ǵylym akademiiasynyń Memleket jáne quqyq institýtynda ǵylymi qyzmetker boldy. Astana qalasynyń Qazaq gýmanitarlyq zań ýniversitetiniń Quqyq jáne memlekettik qyzmet institýtynyń direktory qyzmetin atqardy. Ol memlekettik qyzmettegi mansabynda da mol tájiribe jinap úlgerdi.
2001-2006 jyldary Qaraǵandy oblysy ákiminiń orynbasary. 2006-2008 jyldary Qazaqstan Respýblikasy Ádilet ministrligi Din ister komitetiniń tóraǵasy bolyp jumys istedi. 2008 jyldyń qańtarynda Qazaqstan halqy Assambleiasy Hatshylyǵynyń meńgerýshisi bolyp taǵaiyndaldy.
