ءبىر كۇننىڭ ىشىندە ەلىمىز وڭىرلەرىندە ءبىرقاتار ءىرى تاعايىنداۋلار ورىن الدى. وسى ورايدا ەرالى توعجانوۆ ماڭعىستاۋ وبلىسىنىڭ اكىمى، ەرلان قوشانوۆ قاراعاندى وبلىسىنىڭ اكىمى،  قۇمار اقساقالوۆ سولتۇستىك قازاقستان وبلىسىنىڭ اكىمى، مالىك مىرزالين اقمولا وبلىسىنىڭ اكىمى لاۋازىمىنا، سونداي-اق قاراعاندى وبلىسىنىڭ بۇرىنعى اكىمى نۇرمۇحامبەت ابدىبەكوۆ رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتوراعاسى بولىپ تاعايىندالدى. ال دارحان مىڭباي قازاقستان حالقى اسسامبلەياسى ءتوراعاسىنىڭ ورىنباسارى، قازاقستان رەسپۋبليكاسى پرەزيدەنتى اكىمشىلىگىنىڭ قازاقستان حالقى اسسامبلەياسى حاتشىلىعىنىڭ مەڭگەرۋشىسى قىزمەتىنە بەكىتىلدى.

«قازاقپارات» حاا تىلشىسىنە بەرگەن سۇحباتىندا قازاقستاندىق ساياساتتانۋشى ەرلان سايروۆ بۇگىنگى كادرلىق اۋىس-تۇيىستەرگە پىكىر ءبىلدىردى.

– كادرلاردى الماستىرۋ – ول زاڭدى ۇدەرىس. بۇرىندارى وبلىس اكىمى رەتىندە وڭىرلەردىڭ ادامدارىن تاعايىندايتىن. اسىرەسە، بۇنداي ءۇردىس 2010-شى جىلداردىڭ بىسىندا بايقالعان ەدى. دەگەنمەن دە، بيلىكتىڭ ورتالىق ورگاندارىنا جۇمىس تاجىريبەسى بار ادامدار دا كەرەك. سەبەبى اكىمدەرگە ءبىلىم بەرۋ، ەكونوميكا سالالارىنداعى كوپ باعدارلامالاردى ۇيلەستىرۋ قاجەت ەكەنى بەلگىلى. قازىرگى كەزدە وڭىرلەردە بيزنەستى دامىتۋ بويىنشا باعدارلاما جۇزەگە اسىرىلۋدا، وسى رەتتە قوماقتى سومادا قاراجات بولىنۋدە. وسىنداي جاعدايدا رەسپۋبليكالىق دەڭگەيدە جۇمىس تاجىريبەسى بار قىزمەتكەرلەر كەرەك شىعار، – دەپ توقتالدى ول. سونىمەن قاتار ساياساتتانۋشى سوڭعى جىلدارى ە. توعجانوۆ يدەولوگيالىق باعىتتا جۇمىس ىستەگەنىن ەسكە سالىپ ءوتتى.

– نەگىزى ەرالى توعجانوۆ – ول تاجىريبەلى مەنەدجەر. ول جۇمىس ىستەگەن كەزەڭدە قازاقستان حالقى اسسامبلەياسى ءتيىمدى ورگانعا اينالدى، ياعني قحا ۇلتارالىق قاتىناستار سالاسىنداعى ماسەلەلەردى رەتتەۋگە قاۋقارلى. سوڭعى 10 جىلدا بىزدە بۇل سالادا تەرىس ۇردىستەر، قوعامدىق ءتارتىپتى بۇزۋدىڭ اسقىنعان جاعدايلارى ورىن العان جوق، – دەپ ءتۇسىندىردى سايروۆ.

بۇدان بولەك، ول ەرالى توعجانوۆتىڭ ەلەۋلى ۇيىمداستىرۋشىلىق قابىلەتتەرىنە دە توقتالىپ ءوتتى. «ماڭعىستاۋ ءوڭىرى ەرەكشە ايماقتاردىڭ ءبىرى. مەنىڭ ويىمشا، وسى وڭىردە گۋمانيتارلىق سالادا جۇمىس ىستەپ، ديپلوماتيالىق قابىلەتتىڭ مۇمكىندىكتەرىن پايدالانۋ كەرەك، – دەپ پايىمدايدى ساياساتتانۋشى.

اتاپ ايتقاندا، توعجانوۆتىڭ اتقارعان قىزمەتتەرىنىڭ قاتارى قالىڭ، ونىڭ ىشىندە ايتارلىقتاي جاۋاپتى لاۋازىمداردى دا اتقاردى. ول ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ مەملەكەت جانە قۇقىق تەورياسى مەن تاريحى كافەدراسىندا وقىتۋشى،  ق ر عىلىم اكادەمياسىنىڭ مەملەكەت جانە قۇقىق ينستيتۋتىندا عىلىمي قىزمەتكەر بولدى. استانا قالاسىنىڭ قازاق گۋمانيتارلىق زاڭ ۋنيۆەرسيتەتىنىڭ  قۇقىق جانە مەملەكەتتىك قىزمەت ينستيتۋتىنىڭ ديرەكتورى قىزمەتىن اتقاردى. ول مەملەكەتتىك قىزمەتتەگى مانسابىندا دا مول تاجىريبە جيناپ ۇلگەردى.

2001-2006 جىلدارى قاراعاندى وبلىسى اكىمىنىڭ ورىنباسارى.  2006-2008 جىلدارى قازاقستان رەسپۋبليكاسى ادىلەت مينيسترلىگى ءدىن ىستەر كوميتەتىنىڭ ءتوراعاسى بولىپ جۇمىس ىستەدى. 2008 جىلدىڭ قاڭتارىندا قازاقستان حالقى اسسامبلەياسى حاتشىلىعىنىڭ مەڭگەرۋشىسى بولىپ تاعايىندالدى.