Memleket basshysy Qasym-Jomart Toqaev halyqqa arnaǵan Joldaýynda elimizde balyq sharýashylyǵyn damytýdyń mańyzdylyǵyna toqtalyp, Úkimetke naqty tapsyrma júktegen edi.
Prezident tapsyrmasyna sáikes, salany damytýdyń 2021-2030 jylǵa arnalǵan baǵdarlamasy qabyldanyp, júzege asyryla bastady.
Baǵdarlama sheńberinde 2030 jyly elimizde balyq ósirý kólemin 270 myń tonnaǵa jetkizý josparlanǵan.
Bul oraida, Túrkistan oblysynda 20 myń tonnaǵa jetkizý mejesi tur. Jalpy 2022 jyly óńirde 6199,85 tonna taýarly balyq óndirilgen. Biyl 6640 tonna taýarly balyq óndirý kózdelip otyr. Búginde atalǵan jospardy oryndaý baǵytynda naqty jumystar júrgizilip jatyr.
Brifing barysynda mekeme basshysy Abai Qypshaqbaev óńirimizde balyq ósirý sharýashylyǵy qarqyndy damyp kele jatqanyn tilge tiek etip, bul baǵytta kásipkerlerge kómek beretin mekteptiń nátijeli jumystarymen tanystyrdy.
Spikerdiń aitýynsha, Túrkistan oblysynda balyq ósirý, akvaósirý salasyn damytý maqsatynda alǵash ret «Shardara balyq mektebi» JShS-i 2022 jyly óz jumysyn bastaǵan. Búginde mektep kásipkerlerdi 70 paiyz tájiribelik, 30 paiyz joǵary dárejeli mamandardyń teoriialyq sabaqtarymen ushtastyryp, oqytyp jatyr.
Sondai-aq, mekteptiń oqytý kýrsyna qatysýshylardyń 50 paiyzy ózge óńirlerden kelgen. Atap aitsaq, Túrkistan oblysynan bólek, Almaty, Aqtaý, Atyraý, Kókshetaý, Taraz jáne Aqtóbe t.b. qalalardan keletin kásipkerler bar. Búginde olar sharýashylyqtaryn damytý úshin qajetti bilim alyp, kásipterin jandandyrǵan.
– Shardara aýdanynda 20 jyldan beri balyqty óńdep, eksporttaýmen ainalysyp kele jatqan «Hamit» aýyl sharýashylyǵy óndiristik kooperativi bar. Osy mekemeniń qasynan balyq sharýashylyǵyn damytý maqsatynda oqytý kýrsyn qolǵa aldyq. Basty maqsatymyz – halyqty sapaly ónimmen qamtyp, sharýashylyqty ónerkásiptik deńgeige kóterý, ekonomikalyq turǵydan tartymdy etý.
Sondai-aq, munda balyqty qoldan jáne jasandy túrde ósirýge múmkindik bar. Odan bólek, kásipkerlerge balyqty dernásilden bastap taýarly balyq kólemine deiin ósirýdiń qyr-syryn, ári qarai balyq ósirýge naqty qyzyǵýshylyq tanytqan biznes ókilderine toǵan qazý, sharbaq ornatý, bassein qurý jáne ol jerge shabaqtardy jiberý jaiy úiretiledi.
Mektep búginge deiin 50 oqýshydan turatyn 6 lekti oqytqan. Onyń ishinde, 15 biznes ókili qyzyǵýshylyq tanytyp, balyq ósirý kásibin ashqan. Olar qazirgi tańda mekteppen turaqty bailanys ornatyp, kásipterin damytyp otyr.
Bir aptaǵa arnalǵan oqytý kýrsynyń aqysy – 200 myń teńge. Oqý kýrsy, jatyn orny men tamaǵy osy mektep tarapynan qamtamasyz etiledi.
Brifingte belgili bolǵandai, balyq sharýashylyǵymen ainalysatyn sharýalarǵa memleket tarapynan qoldaý kóp. Máselen, balyqqa beriletin jemniń 30 paiyzy memleket esebinen sýbsidiialanady. Sonymen qatar, taýarly balyq ósirýshi sharýashylyqtarǵa arnalǵan tehnika men jabdyq satyp alýǵa da qomaqty qoldaý bar.
