Jazýshy ári baspager Eldos Toqtarbai Qazaqstan Jazýshylar odaǵy (QJO) janyndaǵy Balalar men jasóspirimder ádebieti janrlyq keńesiniń tóraǵasy qyzmetinen alynǵanyn habarlady. Onyń aitýynsha, mundai sheshim Til máselesine qatysty jazbalaryna bailanysty qabyldanǵan, dep habarlaidy Dalanews.kz.
Baspagerdiń sózinshe, bul sheshim saparda júrgen kezinde qabyldanypty. Ol QJO tóraǵasy Mereke Qulkenovtiń keńes tóraǵasy qyzmetinen bosatý týraly sheshim shyǵarǵanyn, sondai-aq keńestegi eki áriptesine de «ornyn bosatsyn» degen nusqaý berilgenin jazdy.
«Eki aptadai elden jyraq, saparda júrgenimde, meni QJO Tóraǵasy Mereke aǵa Qulkenov Balalar men jasóspirimder ádebieti janrlyq keńesiniń tóraǵasy qyzmetinen TIL týraly jazǵan jazbalarym úshin alyp tastapty. Keńestegi eki áriptesime “Ornyn bosatsyn!” dep ámir beripti», – dep jazdy ol.
Eldos Toqtarbai bul qyzmettiń qoǵamdyq negizde, aqysyz atqarylǵanyn atap ótti.
«Anyǵynda, bul - qoǵamdyq qyzmet, iaki bir tiyn almaityn aqysyz-pulsyz jumys», – dedi ol.
Jazýshynyń aitýynsha, onyń basty maqsaty laýazym emes, ulttyq balalar ádebietiniń bedelin kóterý bolǵan. Ol keńes jumysyna belsendi kirisip, birqatar jobany iske asyrǵanyn atap ótti.
«Meniń kózdegenim - qyzmet emes edi, ulttyq balalar ádebietiniń bedelin kóterip, keńes jumysyn jandandyryp, búkil qazaq balalar jazýshylarynyń joqtaýshysy, qorǵaýshysy bolsam degen aq nietim ǵana bolǵan-tyn», – dedi ol.
Avtor bes aidyń ishinde keńes aiasynda birqatar naqty jumys atqarylǵanyn jazdy. Atap aitqanda, umyt qalǵan balalar jazýshylaryn túgendeý, ómirden ótken qalamgerlerdi ulyqtaý, birneshe kitap seriiasyn iske qosý, barlyǵy toǵyz kitap shyǵarý jáne taǵy jeti kitapty baspaǵa daiyndaý qolǵa alynǵan.
Sonymen qatar, onyń málimetinshe, elimiz boiynsha balalar taqyrybynda qalam terbeitin 117 jazýshy biriktirilip, ortaq ádebi baza jasalǵan.
«Osy keńeske kele sala umyt qalǵan balalaryn jazýshylaryn túgendep, ómirden ótkenderin ulyqtap… QR boiynsha balalar taqyrybyna jazatyn kári-jasy bar 117 jazýshynyń basyn ortaq chatqa qosyp, ádebi baza jasadyq», – dep jazdy ol.
Eldos Toqtarbai jýyrda jas ata-analar men balalarǵa arnalǵan, táýlik boiy tegin qyzmet kórsetetin «QJO Balalar ádebieti» atty ádebi sait ashýdy josparlap júrgenin de aitty. Alaida dál osy sátte qyzmetten alynǵanyn qynjyla jetkizdi.
Avtor óz jazbasynda bul sheshimge qatysty túrli áńgimelerdiń taraǵanyn da joqqa shyǵarmady.
«“Myna bala Odaq tóraǵasy bolǵaly júr” degen sypsyń sóz taraǵanyn ózim de talai estigenmin. Biraq sol qańqý sózdiń birin de elemei, eńbektene berippiz», – dedi ol.
Sóz sońynda Eldos Toqtarbai til máselesinde ustanymynan ainymaitynyn meńzep, áriptesterinen keshirim surady.
«Tiliniń múddesi taptalǵan jerde taq úshin jantalasyp, ólermendik tanytý - súiegine Alash rýhy sińgen azamatqa jarasar qylyq emes!», – dep túiindedi ol.
