Jýrnalist Janbolat Mamai Pýtindi synaimyn dep basy bálege qalǵan aqtóbelik Sanat Dosovtyń jaǵdaiyna qatysty pikirin bildiripti. Bul týraly ol óziniń áleýmettik jelidegi paraqshasynda jazǵan eken.
Aqtóbede Pýtinge til tigizgen blogerdi 3 jylǵa sottap jiberdi.
Oǵan Resei soty emes, bizdiń, qazaq soty úkim shyǵardy. Tipti Reseidiń ózinde tikelei Pýtinge syn aitqan adamnyń sottalyp ketkenin estimeppin. Esesine bizdiń elde, táýelsiz elde osyndai jaǵdai oryn aldy.
Qazaqstanǵa qatysy joq adamdy synǵa alǵany úshin beishara bloger sottalyp kete bardy.
Osy ádiletti me?
Blogerdi sottaǵan sot Kremldiń shovinisteri Jirinovskii men Limonovtyń ústinen nege is qozǵamaidy? Bul ekeýi "Qazaqstannyń soltústigin Reseige berińder" dep eldi arandatqanda bizdiń bilik nege únsiz qalady? Bul ekeýi "qazaqta memleket bolmaǵan" dep tutas ultty mazaq etkende bizdiń bilik nege únsiz qalady?
Pýtin de dál osylai aitqan. "Qazaq memleketi 1991 jyly paida bolǵan" degen ol. Bizdiń bilik sol kezde nege qarsylyq notasyn jibermedi?
Jirinovskii siiaqtylardyń shovinistik urandaryn kúlli Qazaqstanǵa taratyp otyrǵan reseilik aqparat quraldaryna nege tyiym salmaidy bizdiń bilik? Kúnine bireýi qulaityn "Protondardy" ushyrýǵa nege qarsylyq bildirmeidi bizdiń bilik?
Saýal kóp. Ainalyp kelgende, bilik kimniń soiylyn soǵyp otyr ózi? Til tigizýge bolmaityn Pýtin sonshalyqty paiǵambar ma edi?
Aitpaqshy, osy úshin sottalyp ketken Sanat Dosovtyń artynda alty balasy qaldy. Olarǵa kim kómektesedi?
Eger biz shyn táýelsiz bolsaq blogerdi bosatýymyz kerek. Kerisinshe, qazaqtyń memleketi men táýelsizdigin moiyndamaǵandar túrmege otyrsyn.
Aýdarǵan, Dýman BYQAI
