جۋرناليست جانبولات ماماي پۋتيندٸ سىنايمىن دەپ باسى بەلەگە قالعان اقتٶبەلٸك سانات دوسوۆتىڭ جاعدايىنا قاتىستى پٸكٸرٸن بٸلدٸرٸپتٸ. بۇل تۋرالى ول ٶزٸنٸڭ ەلەۋمەتتٸك جەلٸدەگٸ پاراقشاسىندا جازعان ەكەن.
اقتٶبەدە پۋتينگە تٸل تيگٸزگەن بلوگەردٸ 3 جىلعا سوتتاپ جٸبەردٸ.
وعان رەسەي سوتى ەمەس, بٸزدٸڭ, قازاق سوتى ٷكٸم شىعاردى. تٸپتٸ رەسەيدٸڭ ٶزٸندە تٸكەلەي پۋتينگە سىن ايتقان ادامنىڭ سوتتالىپ كەتكەنٸن ەستٸمەپپٸن. ەسەسٸنە بٸزدٸڭ ەلدە, تەۋەلسٸز ەلدە وسىنداي جاعداي ورىن الدى.
قازاقستانعا قاتىسى جوق ادامدى سىنعا العانى ٷشٸن بەيشارا بلوگەر سوتتالىپ كەتە باردى.
وسى ەدٸلەتتٸ مە?
بلوگەردٸ سوتتاعان سوت كرەملدٸڭ شوۆينيستەرٸ جيرينوۆسكيي مەن ليمونوۆتىڭ ٷستٸنەن نەگە ٸس قوزعامايدى? بۇل ەكەۋٸ "قازاقستاننىڭ سولتٷستٸگٸن رەسەيگە بەرٸڭدەر" دەپ ەلدٸ ارانداتقاندا بٸزدٸڭ بيلٸك نەگە ٷنسٸز قالادى? بۇل ەكەۋٸ "قازاقتا مەملەكەت بولماعان" دەپ تۇتاس ۇلتتى مازاق ەتكەندە بٸزدٸڭ بيلٸك نەگە ٷنسٸز قالادى?
پۋتين دە دەل وسىلاي ايتقان. "قازاق مەملەكەتٸ 1991 جىلى پايدا بولعان" دەگەن ول. بٸزدٸڭ بيلٸك سول كەزدە نەگە قارسىلىق نوتاسىن جٸبەرمەدٸ?
جيرينوۆسكيي سيياقتىلاردىڭ شوۆينيستٸك ۇراندارىن كٷللٸ قازاقستانعا تاراتىپ وتىرعان رەسەيلٸك اقپارات قۇرالدارىنا نەگە تىيىم سالمايدى بٸزدٸڭ بيلٸك? كٷنٸنە بٸرەۋٸ قۇلايتىن "پروتونداردى" ۇشىرۋعا نەگە قارسىلىق بٸلدٸرمەيدٸ بٸزدٸڭ بيلٸك?
ساۋال كٶپ. اينالىپ كەلگەندە, بيلٸك كٸمنٸڭ سويىلىن سوعىپ وتىر ٶزٸ? تٸل تيگٸزۋگە بولمايتىن پۋتين سونشالىقتى پايعامبار ما ەدٸ?
ايتپاقشى, وسى ٷشٸن سوتتالىپ كەتكەن سانات دوسوۆتىڭ ارتىندا التى بالاسى قالدى. ولارعا كٸم كٶمەكتەسەدٸ?
ەگەر بٸز شىن تەۋەلسٸز بولساق بلوگەردٸ بوساتۋىمىز كەرەك. كەرٸسٸنشە, قازاقتىڭ مەملەكەتٸ مەن تەۋەلسٸزدٸگٸن مويىنداماعاندار تٷرمەگە وتىرسىن.
اۋدارعان, دۋمان بىقاي
