QR Ulttyq Bank tóraǵasy Timýr Súleimenov arnaiy brifing barysynda elimizdiń valiýta naryǵyndaǵy ahýalǵa toqtaldy. Onda da teńge devalvatsiiasy yqtimaldylyǵyna qatysty óz kózqarasyn bildirdi, dep habarlaidy Dalanews.kz.
"Devalvatsiia yqtimaldylyǵyna keletin bolsaq. Birinshiden, devalvatsiia, ókinishke orai, bizdiń túsinigimizde qalyptasqan maǵynada, iaǵni ár kez jinaqtalyp, taǵy jinaqtalyp, sodan keiin bir kúni burq ete túsedi. Árine, ol erkin ózgermeli baǵamnyń infliatsiialyq targetteý rejimi aiasynda múmkin emes. Men muny taǵy da rastai ketkim keledi, bizdiń aqsha baǵamy qozǵalysyna ózderińiz kýá bolyp otyrsyzdar, biraq ol qatty sekiris jasap qozǵalyp jatqan joq: oǵan ishki jáne syrtqy faktorlardyń áseri túrtki ekeni anyq, odan teńge kúsheiý jáne álsireý turǵysynda da ózgerýi múmkin", – dep atap ótti Timýr Súleimenov.
Sonymen qatar, onyń aitýynsha, bul arada negizge alynatyny, negizinen, syrtqy faktor jáne eń aldymen munaidyń baǵasy.
"Eger munai baǵasy turaqty jáne uzaq ýaqyt tómen bolsa, ol Qazaqstannyń eksporttyq múmkindikterine, Qazaqstannyń tólem balansyna, ishki naryqtaǵy dollar usynysyna keri áser etedi jáne tiisinshe teńge baǵamynda ózgeris bolady. Eger munai baǵasy, Qazaqstannyń basqa da eksporttyq pozitsiialary boiynsha baǵa qolaily deńgeide saqtalsa jáne sonymen birge import kólemi tómendeitin bolsa, onda jaǵdai anaǵurlym turaqty bolatyny túsinikti. Qazir, meniń oiymsha, álemdik qarjy, energetika, taýar naryqtarynda ne bolatynyn boljap, naqty aita alatyn álemde bir de bir ekonomist joq, óitkeni dúdamal tustar tym kóp", – dep atap ótti Timýr Súleimenov.
Ol Ulttyq Bank Úkimetpen birlesip AQSh siiaqty negizgi oiynshylardan kelip túsken aqparattardy súzgiden ótkize otyryp, balama boljamdar ázirlep jatqanyn aitty.
"Biz boljamdardy jańartyp jatyrmyz. Dál qazir Ulttyq ekonomika ministrligindegi áriptesterimizben bizdiń sarapshylar bir ústelge otyryp, modelderdi qarastyryp esep júrgizýde. Biz dúrbeleńge boi aldyratyndai qandai da bir úlken sebepterdi kórip turǵanymyz joq. Negizinen, ekonomikalyq ósim de, memlekettik qarjy kórsetkishteri de boljanǵan shekter mańaiynda. Soǵan sáikes, biz qazirgi ýaqytta jaǵdai turaqty dep sanaimyz. Kórsetkishter qarqyny qalai damityny tek Qazaqstanǵa ǵana emes, álemdik energetikalyq jáne qarjy naryqtaryndaǵy jaǵdailar qalai oiysatyndyǵyna da bailanysty bolady", - dep sózin túiindedi Timýr Súleimenov.
Buǵan deiin Ulttyq Bank bazalyq mólsherlemeniń burynǵy kólemi - 16,5% deńgeiinde qaldyrǵandaryn málimdegen. Alaida retteýshi organ kútpegen shalt oqiǵalar jaǵdai oryn alyp jatsa, ony merziminen buryn ózgertý týraly quziretin óz enshilerine qaldyryp otyrǵandaryn da naqtylady.
