Keshe ǵana 1 AQSh dollary 544, 26 teńgeden 548,79 teńgege qymbattap, ústine birden 4,34 teńge qosyp aldy. Al aqsha aiyrbas oryndarynda amerikalyq valiýta, tipti 550 teńgeden satylyp psihologiialyq shekti igerdi. Valiýta naryǵyndaǵy búgingi ahýal qandai? Oǵan saraptamalyq ortalyqtardyń "kózimen" qarap kórelik, dep habarlaidy Dalanews.kz.
"Qor birjasyndaǵy dúisenbi kúngi saýda-sattyq qorytyndysyna sáikes, USDKZT juby boiynsha 1 AQSh dollarynyń ortasha baǵamy 548,77 teńgeni (+4,32 teńge) qurady, saýda kólemi 286,6 mln dollar (-47,8 mln) boldy. Ulttyq valiýtanyń bulaisha álsireýi álemdik naryqta munaidyń arzandaýy, sondai-aq aidyń aiaǵynda importtyq kelisimsharttar men syrtqy boryshtaryna qatysty mindettemelerin oryndaityn otandyq kompaniialar tarapynan shetel valiýtasyna degen suranystyń dástúrli túrdegi artýy aiasynda oryn aldy. Aita ketelik, teńgeniń shamadan tys álsireýi importtyq taýarlardyń qunyna teris áser etýi jáne infliatsiialyq protsesterdiń artýyna ákelip soǵýy múmkin (aqsha baǵamynyń álsireýi tutynys baǵasyna ótýi áserinen)", - deidi Qazaqstan qarjygerleri qaýymdastyǵy.
Al BCC Invest sarapshylary qyrkúiek aiynyń qorytyndysy boiynsha jyldyq infliatsiia kólemi 12,7-12,9%-ǵa deiin qarqyn alady dep sanaidy.
"Kóktemde bazalyq mólsherlemeni 16,5%-ǵa deiin kóterý ári osy kólemniń jaz boiy saqtalýy ekonomikamyzdyń keibir segmentterinde baiaýlaý túrindegi áserdi tanytty, al qyzmetter men azyq-túlik baǵalarynyń ósimi infliatsiiaǵa túsetin qysymdy údetýdi jalǵastyrýda. Osy jaǵynan alǵanda, infliatsiiany aýyzdyqtaý maqsatynyń aýyly áli alys. Jaǵdaidy shalt ózgertý úshin aldymen ekonomikalyq joǵary kútýler kórsetkishin aýyzdyqtaý kerek. Sonda ǵana ailyq infliatsiia 0,4% deńgeiinde turaqtap, kúzden keiingi jyldyq infliatsiia kórsetkishiniń tómendeýine jol asha alady", delingen BCC Invest boljamynda.
Buǵan deiin 2024 jyly bank sektorynda dollardan arylý protsesi óz jalǵastyǵyn tapqanymen, onyń qarqyny baiaýlaǵanyn, munyń sebebi kúni keshe QR Ulttyq Bank jariialaǵan Qarjylyq turaqtylyq týraly esepte egjei-tegjei aitylǵanyn jazǵanbyz.
