Kez kelgen irgeli mekemede eńbek daýy bolatyny – zańdylyq. Biraq onyń saıasılanyp ketýi jumys berýshi men memleket úshin – úlken syn.

Osydan birshama ýaqyt buryn «Qazaqstan temir joly» Ulttyq kompanıasyna qarasty PCH-12 Beıneý jol dıstansıasy temirjol qyzmetkerleri aılyqtarynyń azdyǵyn aıtyp, kompanıa basshylyǵyna talabyn ashyq qoıǵanyn estidik.

Damyǵan elderde qarapaıym eńbek adamdarynyń jumys berýshilerine talap qoıyp, ortaq mámilege kelýi qalypty dúnıe bolyp sanalady. Ádette eńbek adamdary men jumys berýshiler arasyndaǵy daý-damaılardy kásipodaq uıymdary oń baǵytta sheshýge kúsh salatynyn bilemiz.

Biraq bizdiń elde kásipodaq ondaı yqpaldy uıym emes. Sondyqtan jumysshylar óz talaptaryn ashyq qoıyp jatady.

Sol sıaqty beıneýlik temirjolshylar óz talaptaryn QTJ basshylyǵyna ashyq qoıyp, sot oryndaryna júginip, taraptar ortaq kelisimge kelipti.

Búgin ereýildetken temirjolshylar sot oryndary arqyly qabyldaǵan ortaq sheshimge rıza bolyp, jumystaryna qaıta kiriskenin aıtyp vıdeo úndeýin jarıalady. Sonymen qatar temirjolshylar qandaı da bir saıası maqsat kózdegen belsendi toptardyń osy oqıǵany paıdalanyp ketýine túbegeıli qarsy ekenderin ashyp aıtty.

Jalpy, Mańǵystaý óńirinde eńbek daýlary jıi oryn alyp, onyń sońy saıasılanyp ketetini jasyryn emes. Qarapaıym eńbek adamyna máseleniń bulaısha ýshyǵýy qajet emes. Aldaǵy ýaqytta kez kelgen eńbek daýynyń sońy osylaı taraptardyń kelisimge kelýimen aıaqtalýy tıis dep esepteımiz. Bul jaǵdaı elimizdegi jekelegen kompanıalarǵa, qarapaıym eńbek adamdaryna da sabaq bolatyn jaǵdaıat dep esepteımiz.