SQO ákimdiginiń otyrysynda «Taza Qazaqstan» respýblıkalyq aksıasynyń júzege asyrylýy týraly másele qaraldy,- dep habarlaıdy Dalanews.kz
Aksıa bastalǵannan beri oblysta 271 shara uıymdastyrylyp, 2,8 myń ekologıalyq aksıa ótkizildi. Merekelik sharalardyń mańyzdy bóligi retinde halyqpen túsindirý jumystary júrgizilip, 638 kezdesý ótkizilip, onda sanıtarlyq talaptar men ekologıalyq mádenıetti qalyptastyrý máseleleri talqylandy.
Senbilikterge 158 myńnan astam adam, 6,1 myń bıznes sýbektisi jáne 63 ónerkásiptik kásiporyn qatysty. Júrgizilgen jumystar nátıjesinde 578 tarıhı-mádenı eskertkishter, 200-den astam saıabaq pen skver, 23 sýburqaq tazartyldy. Qoqys jınaýǵa 2,4 myń birlik tehnıka tartyldy. 53 myń aýla aýmaǵy tazartyldy, 167 myń tonna qoqys polıgondarǵa shyǵaryldy. Sondaı-aq, 34 myńnan astam aǵash pen 3,2 myń buta otyrǵyzyldy.
Memleket basshysy «Taza Qazaqstan» aksıasy bir rettik shara emes, ekologıalyq mádenıetti qoǵamda engizýdiń ulttyq mindeti ekendigin atap ótti. Oblys ákimi bıznes-qoǵamdastyǵyn, depýtattardy, qoǵamdyq pikir kóshbasshylaryn, úkimettik emes uıymdardy jáne oblys turǵyndaryn ekologıalyq ustanymdy qalyptastyrýǵa, qorshaǵan ortany saqtaýǵa jáne «Taza Qazaqstan» aksıalaryna belsene qatysýǵa shaqyrdy.
Keńes qorytyndysy boıynsha óńir basshysy memlekettik organdarǵa ekologıalyq mádenıetti damytý jónindegi Konsepsıany júzege asyrýǵa arnalǵan óńirlik jospardyń oryndalýyn qamtamasyz etý, aǵash otyrǵyzý jáne aýmaqtardy tazartý jumystaryn jandandyrý boıynsha tapsyrmalar berdi. Sondaı-aq, turǵyndar arasynda ekologıalyq saýattylyqty arttyrý úshin túsindirý jumystaryn kúsheıtý qajettiligi atap ótildi.
