Túrkistan óńirinde «Taza Qazaqstan» baǵdarlamasy oblys kóleminde turaqty júrgizilýde. Bekitilgen keste boiynsha aýdan, qalalarda jalpy 450 aýqymdy senbilik ótkizildi. Bul týraly búgin oblys ákimi Darhan Satybaldynyń tóraǵalyǵymen ótken apparat májilisinde keńinen talqylandy. Óńir basshysy bul baǵyttaǵy jumystardy odan ári jandardyrýdy, júieleýdi jáne jiti qadaǵalaýdy tapsyrdy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Árbir memlekettik jáne biýdjettik mekemeler óz aýlasyn, ǵimaratyn taza ustasyn. Bilim, densaýlyq, mádeniet, sport jáne ózge de áýeýmettik nysandardaǵy tazalyq qadaǵalanyp jatyr. Tazalyq jumystaryna nemquraily qaraǵan basshylar synnan qorytyndy shyǵarmasa, kemshilik qaitalansa, qyzmetinen bosatylady. Jumys júieli túrde jalǵassyn, – dedi Darhan Satybaldy.
Jiyn barysynda atqarylǵan jumystar týraly oblys ákiminiń birinshi orynbasary Zulpyhar Joldasov baiandama jasady. Onyń aitýynsha, ótken aptanyń ishinde 11 aýdannyń 30 eldi mekeninde senbilikter ótkizilgen. Oǵan 6 myńdai turǵyn qatysyp, tiisti tehnikalar jumyldyrylǵan. Nátijesinde 98,7 tonna qoqys shyǵaryldy.
Sonyń ishinde Sozaqtaǵy aýqymdy senbilikke 3 500-den astam adam atsalysyp, 17 tehnika jumyldyrylǵan. Sonymen qatar aýdan men qalalarǵa kireberis aýmaqtaryn retteý, tazalaý jumystary júrgizilgen. Sondai-aq 21 qyrkúiek kúni búkilálemdik tazalyq kúnine orai oblystyń barlyq aýmaǵynda senbilikter ótkizildi. Jalpy jyl sońyna deiin 807 senbilik ótkizý josparlanǵan.
Telegramm bot platformasynda búgingi tańda 431 ótinim túsken. Onyń ishinde 415-i oryndalǵan. Baǵdarlamany turǵyndarǵa keńinen nasihattaý jumystary júrgizilýine bailanysty, platformada ótinimderdiń sany kóbeiýde, ótken aidyń tiisti kezeńimen salystyrǵanda 96 ótinimge nemese 29,4 paiyzǵa ósken.
Biyl qoǵamdyq oryndarda zań talaptaryn buzǵan tulǵalarǵa 23 434 myńnan astam hattama toltyrylyp 249,5 mln teńgege aiyppul salyndy. Baǵdarlama bastalǵaly beri eskertýler men salynǵan aiyppuldar sany 16 mynan astam hattamaǵa artqan nemese 4 esege ulǵaiǵan. Sondai-aq búgingi tańǵa, abattandyrý qaǵidasyna sáikes irgeles jatqan aýmaqtyń tazalyǵy boiynsha 11 004 jeke turǵyn úi men 6 147 kásipkerlik obektisine monitoring júrgizildi. Olarǵa 1143 eskertý jáne 620 aiyppul salyndy. Qaǵidanyń sapaly oryndaý baǵytyndaǵy jumystar kúndelikti júrgiziledi.
«Taza Qazaqstan» baǵdarlamasy aiasynda bilim, densaýlyq, mádeniet, kásipkerlik nysandary, politsiia pýnktteri jáne «Qazposhta» filialdarynyń jaǵdaiyna monitoring júrgizildi. Nátijesinde tazalyq, abattandyrý boiynsha kemshilikter anyqtalǵan. Osy mekemelerdiń basshylaryna tiisti eskertý berilip, kemshilikterdi joiý jóninde tapsyrma berildi. Monitoring jalǵasady.
