Tailand pen Kambodja shekaralyq qaqtyǵys aimaǵynda atysty toqtatý týraly kelisimge qol qoidy. Bul týraly Thai PBC jazdy, dep habarlaidy Dalanews.kz
Málimetke sáikes, úsh kúnge sozylǵan kúrdeli kelissózder Chantabýri provintsiiasyndaǵy Pong Nam Ron aýdanynda ornalasqan Ban Pakkad kóshi-qon keńsesinde ótti. Nátijesinde eki eldiń Bas shekaralyq komitetteri alǵashqy atysty toqtatý rejiminiń sharttaryn kelisip, ol 27 jeltoqsanda jergilikti ýaqytpen saǵat 12:00-de (Astana ýaqytymen 10:00-de) kúshine endi. Sondai-aq Tailand kambodjiialyq 18 áskeri tutqyndy bosatýǵa mindetteme aldy.
Tailand tarapynyń derekkózi alǵashqy bitim 72 saǵat boiy baqylaýda bolatynyn, al keiingi kez kelgen kelisimdi eldiń Ulttyq qaýipsizdik keńesi maquldaýy tiis ekenin málimdedi.
Kelissózder barysynda taraptar úshin qolaily sharttardy pysyqtaý ońai bolmaǵany aityldy. Soǵan qaramastan, Joǵary tatýlasý keńesi hatshylyǵynyń otyrysy altynshy kelisim jobasyna qol qoiýmen aiaqtaldy.
Eske salsaq, 8 jeltoqsanda Kambodja áskeri tailyq Anýpong bazasyna oq atqan. Buǵan jaýap retinde Tailand biligi shekara mańyndaǵy turǵyndardy qaýipsiz jerlerge kóshirýge shaqyrǵan. Keiin qaqtyǵys eki eldiń ortaq shekarasy boiymen órship, bes óńirdi qamtyp, júzdegen beibit turǵynǵa áser etti.
