Ózgeniń ómiri úshin, ózin qaterge tigip, kún-tún kóz ilmei indetpen arpalysyp jatqan dárigerlerge alǵystan basqa aitarym joq.
Júieniń ózi qaqalyp-shashalyp zorǵa jumys istep tur. Dárigerlerdiń tabandylyǵy, jankeshtiligi bolmasa, áldeqashan qirap tynar edi. Osyndai kembaǵal júieniń kem-ketigin jasyryp, qiyndyqty qasqaia qarsy alǵan aq halatty jandardyń aldynda taǵy bir ret basymdy iemin.
Kórshi qyrǵyzdarda indettiń sheńgeline ilikken naýqastarǵa arnap kúndizgi statsionarlar soǵyp jatyr eken. Bizge de úlgi bolarlyqtai...
Aitqym kelgeni. Densaýlyq saqtaý júiesi memlekettegi kóp salanyń biri ǵana. Bizde tutas júie toqyraǵan. Irip-shirigen júieniń tek bir salasy ǵana aqsap turýy múmkin emes.
Osy elde qai sala minsiz jumys isteidi? Mine, dep saýsaǵyńyzben shuqyp kórsetińizshi?
Ásker me? Byltyr qarý-jaraq qoimasy jarylǵanda áskeri salanyń belsheden bylyqqa batqanyna kýá boldyq. Talai adam saladaǵy salaqtyqtyń qurbany bola jazdady. Qarapaiym tártiptiń qaǵidasy saqtalmaityn bul saladan ne úmit, ne qaiyr?
Aviatsiia? Osydan jarty jyl buryn Qazaqstanda jyrtyq-tesigi jelimdelgen ushaqtar áýege kóterilip júrdi. Qozǵaltqyshtar eshbir esepsiz, baqylaýsyz aýysyp, osy salaǵa jaýaptylar oiyna kelgenin istedi. Saladaǵy sozylmaly korrýptsiia men jaýyrdy jaba toqý sindromy otandyq aviatsiiany aianyshty kúige túsirdi.
Ishki ister ministrligi? Quqyqtyq júie? Bálkim temirjol salasy múltiksiz jumys isteitin shyǵar? Joq, taǵy da jańsaq aittyq. Vagondardyń relstan taiyp, tóńkerilip jatýy úirenshikti jaǵdai. Al jolaýshylar poiyzyna kirýdiń ózi qorqynyshty. Kútimsiz, keteýi-ketken...
Bálkim aýyl sharýashylyǵynyń ahýaly durys shyǵar? Joq, bul sala da memleketke masyl. Halyqty qajetti azyq-túlikpen qamtamasyz etip, asyrai almai otyrǵany óz aldyna, salyq tóleýshilerdiń aqshasyn soryp, halyqqa tiesili jerdi jalmaǵannan ózge bileri joq.
Múmkin jergilikti ákimdikter jurtpen júieli bailanys ornatqan shyǵar? Taǵy da qatelestik. Ákimdikterdiń shalaǵai sheshimi, solaqai saiasatynyń kórinisi – korrýptsiiaǵa batqan LRT. Osy bir beton eskertkish ákimder men halyqtyń arasyndaǵy alshaqtyqtyń aiqyn belgisi ispettes.
Mektep pen JOO-lardyń bilim berý deńgeii qandai? Oǵan ózderińizder de kýásizder. Bizdegi bilim salasynyń áýselesin aýyl mektebindegi dárethanaǵa qarap-aq baǵalaýǵa bolady.
Bul elde birde-bir sala biz kútkendei jumys istemeidi. Astymyzdaǵy kóliktiń tozyǵy jetkeni sondai, áldeqashan kúresinge laqtyrý kerek edik. Biz ony áli súiretip kelemiz. Shopyryn aýystyrǵanymyz bolsa, baiaǵy jartas sol jartas. Eske júieniń jaqtastary maishelpekke bógip, áli de óz ornynda otyr.
Júie aýysqan da, ózgergen de joq. Eldiń aqshasy keter jerine ketip, jemqorlardyń jemsaýyn toltyrýda. Osy júieniń tóbe basynda otyrǵandardyń beti qalyń, olar óz biznesinen ózgeni oilamaidy. Halyqtyń aqshasyn ózine tiesili kompaniialar men bankterge aýdarýda.
Ólmestiń kúnin keshýden qutylǵymyz kelse, júieni aýystyrǵannan ózge jol joq. Júie aýysqanda ǵana onyń qan-tamyry ainala bastaidy. Bul úshin bizge eldiń sózin sóileitin parlament, shynaiy máslihat, sailaý jolymen bilikke kelgen ákimder kerek. Barlyq deńgeide ádiletti saiasi báseke ornamai, mandymaimyz. Biliktegi birneshe adamnyń monopoliiasy munaiy atqylap, gazy burqyrap jatqan halyqty qaiyrshy kúige túsirdi. Netken sory qalyń ult edik...
PS. COVID-19 taraýy boiynsha Qazaqstan álemde aldyńǵy orynǵa shyqty.
