Kópshilik stýdent kezinde baspana alý múmkin emes dep oilaidy. Sebebi ipoteka rásimdeý úshin turaqty tabys pen eńbek ótili qajet. Alaida keibir baǵdarlamalar stýdentterge de úi alý múmkindigin usynady, dep habarlaidy dalanews.kz.
"Qarjylyq saýat" arnasynyń málimetinshe, ekinshi deńgeili bankterdiń basym bóligi shákirtaqyny resmi tabys kózi retinde qabyldamaidy. Sonymen qatar, kóptegen bankte ipoteka rásimdeýge jas shekteýi qoiylǵan.
Al Otbasy banktiń "Naýryz" baǵdarlamasy boiynsha 18 jastan bastap qatysýǵa bolady. Baǵdarlamanyń ereksheligi sol - shákirtaqy resmi tabys retinde esepke alynady. Stýdent oqýmen qatar resmi jumys istese, onyń jalaqysy men shákirtaqysy birge qaralady.
Baǵdarlamaǵa qatysý úshin úmitker Qazaqstan azamaty nemese qandas bolýy, keiingi bes jylda óz atynda turǵyn úii bolmaýy jáne Otbasy bankte depozit ashyp, keminde 2 million teńge jinaýy qajet.
Tabys jetkiliksiz bolǵan jaǵdaida qosymsha qaryz alýshylardy tartýǵa múmkindik bar. Sondai-aq, bastapqy jarna jinaý úshin týystarynyń Otbasy banktegi jinaqtaryn biriktirýge bolady.
Baǵdarlama aiasynda nesie mólsherlemesi - áleýmettik osal sanattar úshin 7 paiyz, qalǵan qatysýshylar úshin 9 paiyz. Almaty men Astanada 36 million teńgege deiin, óńirlerde 30 million teńgege deiin nesie rásimdeýge múmkindik qarastyrylǵan.
Biyl ótinish qabyldaý aiaqtalǵanymen, baǵdarlama aldaǵy birneshe jyl boiy jalǵasady. Sondyqtan mamandar qazirden bastap depozit ashyp, bastapqy jarna jinaýǵa keńes beredi.
