Premer-ministrdiń orynbasary – Ulttyq ekonomika ministri Serik Jumanǵarin 2025 jylǵy 23 maýsymda Senatta Iran men Izrail arasyndaǵy qaqtyǵysqa qatysty túsinikteme berdi, dep habarlaidy Dalanews.kz.
Ol, ázirge bul rette qandai da bir boljam jasaýǵa áli erte dep sanaidy. Qazaqstan jaǵdaidy syrttai baqylap, qos taraptar arasynda beibit kelisimge qol jetkiziledi dep úmittenedi.
"Mundai da biz ne joǵaltaýymyz múmkin, sol jaiyna keletin bolsaq. Negizinen, Qazaqstan Iranǵa azyq-túlik tasymaldaidy. Meniń oiymsha, bul oqiǵalar oǵan áser etpeidi. Kez-kelgen jaǵdaida halyqqa tamaq kerek, el kólemi úlken. Bizdi tek alańdatatyn jalǵyz nárse bar, ol - logistika. Ońtústikke aparatyn jalǵyz temirjol Iran arqyly ótedi. Basqa jol joq, árine biz osy joldyń jabylǵanyn qalamaimyz", - dedi Serik Jumanǵarin.
Ol qazaqstandyq eksporttyń kólemi onsha kóp emes ekenin atap ótti, óitkeni Irannyń temir joldarynyń jaǵdaiy jaqsy emes. Ótken jyly Iranmen aradaǵy taýar ainalymy shamamen 350 million dollardy qurady. Biylǵy alǵashqy bes aida bul kólem 120 million dollardan asty.
"Bizde qosymsha nusqalar bar, negizi. Grýziiadaǵy TMTM (Transkaspii halyqaralyq kólik baǵyty), Qytaidyń Lianiýngan porty arqyly da shyǵa alamyz. Bul logistikany birshama qiyndatady, biraq eger biz úshin uzaq merzimdi saldar týyndap jatsa, onda biz osy marshrýttardy oilastyryp, biznesmenderge kómektesetin bolamyz", – dep sózin túiindedi Jumanǵarin.
