پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين 2025 جىلعى 23 ماۋسىمدا سەناتتا يران مەن يزرايل اراسىنداعى قاقتىعىسقا قاتىستى تۇسىنىكتەمە بەردى، دەپ حابارلايدى Dalanews.kz.

ول، ازىرگە بۇل رەتتە قانداي دا ءبىر بولجام جاساۋعا ءالى ەرتە دەپ سانايدى. قازاقستان جاعدايدى سىرتتاي باقىلاپ، قوس تاراپتار اراسىندا بەيبىت كەلىسىمگە قول جەتكىزىلەدى دەپ ۇمىتتەنەدى.

"مۇنداي دا ءبىز نە جوعالتاۋىمىز مۇمكىن، سول جايىنا كەلەتىن بولساق. نەگىزىنەن، قازاقستان يرانعا ازىق-تۇلىك تاسىمالدايدى. مەنىڭ ويىمشا، بۇل وقيعالار وعان اسەر ەتپەيدى. كەز-كەلگەن جاعدايدا حالىققا تاماق كەرەك، ەل كولەمى ۇلكەن. ءبىزدى تەك الاڭداتاتىن جالعىز نارسە بار، ول - لوگيستيكا. وڭتۇستىككە اپاراتىن جالعىز تەمىرجول يران ارقىلى وتەدى. باسقا جول جوق، ارينە ءبىز وسى جولدىڭ جابىلعانىن قالامايمىز"، - دەدى سەرىك جۇمانعارين.

ول قازاقستاندىق ەكسپورتتىڭ كولەمى ونشا كوپ ەمەس ەكەنىن اتاپ ءوتتى، ويتكەنى يراننىڭ تەمىر جولدارىنىڭ جاعدايى جاقسى ەمەس. وتكەن جىلى يرانمەن اراداعى تاۋار اينالىمى شامامەن 350 ميلليون دوللاردى قۇرادى. بيىلعى العاشقى بەس ايدا بۇل كولەم 120 ميلليون دوللاردان استى.

"بىزدە قوسىمشا نۇسقالار بار، نەگىزى. گرۋزياداعى تمتم (ترانسكاسپيي حالىقارالىق كولىك باعىتى)، قىتايدىڭ ليانيۋنگان پورتى ارقىلى دا شىعا الامىز. بۇل لوگيستيكانى ءبىرشاما قيىنداتادى، ءبىراق ەگەر ءبىز ءۇشىن ۇزاق مەرزىمدى سالدار تۋىنداپ جاتسا، وندا ءبىز وسى مارشرۋتتاردى ويلاستىرىپ، بيزنەسمەندەرگە كومەكتەسەتىن بولامىز"، – دەپ ءسوزىن تۇيىندەدى جۇمانعارين.