Tólebi aýdanynda búginde tamasha bir úrdis qalyptasqan. Kimniń ideiasy bolsa da keremet. Ár aýylda mektep bitirgenine 10, 20 jyl bolǵan túlekter ataýly merekeler kezinde aǵaiynnyń alǵysyna bólenetin saýapty is atqarýda. Olar úshin ózderi bilim alǵan mektepterine syi tartý etý jazylmaǵan zańdylyq ispettes.
Jýyrda aýdanǵa qarasty Tasaryq eldi mekeninde 1998 jylǵy bitirgen túlekter iaǵni, osy eldiń 1981 jyly týylǵan azamattary Táýelsizdik kúnine arnap úlken syi jasady.
Óz aýylyndaǵy jasóspirimderdiń salaýatty ómir saltyn qalyptastyrýǵa jáne jastardyń bos ýaqytyn tiimdi paidalaný maqsatynda óz qarajattary esebinen sporttyq kúres zalyn ashyp berdi.
Qara jumysqa pisken aýyl balalary endi atalmysh zalda shynyǵyp, sheberlikterin shyńdaityn bolady. Jaqyn bolashaqta dál osy zalda kúrestiń álipbiin úirengen órender álemdi moiyndatyp jatsa tańqalmańyz. Aldyńǵy býyn aǵalary salyp bergen kúres zalynyń osyndai igilikti isterdiń bastaýy bolatynyna senim basym.
