Májilis depýtaty Edil Jańbyrshin Atyraýda sý tasqyny kezinde adamdarǵa kómektesken Pshón esimdi ittiń ólimine bailanysty pikir bildirdi, dep habarlaidy Dalanews.kz.
Depýtattyń aitýynsha, qazirgi zańnamada janýarlardy atýǵa tikelei ruqsat joq, biraq belgili bir jaǵdailarda shara qoldanýǵa múmkindik bar.
“Eger janýar agressivti minez kórsetse, adamǵa shabýyl jasasa nemese qutyrma aýrýyna shaldyqqan bolsa, ony shekteýge bolady. Biraq Atyraýda naqty ne bolǵanyn aitý qiyn, sebebi biz ol jerde bolǵan joqpyz”, – dedi Jańbyrshin Qaz365 agenttigine.
Sonymen qatar ol iesi bar itti óltirgender zań boiynsha jaýapqa tartylatynyn aitty.
“Eger it iesine tiesili bolsa jáne ony óltirse, bul zańǵa qaishy áreket bolyp sanalady. Mundai jaǵdaida jaýapkershilikke tartý kózdelgen. Tolyǵyraq málimet alý úshin Atyraýǵa baryp, jergilikti organnan suraǵan jón. Qazir bul oqiǵa boiynsha tekseris júrip jatyr”, – dedi depýtat.
Aita keteiik, buǵan deiin álemjelide kóktemgi sý tasqyny kezinde atyraýlyq turǵyndarǵa kómektesken “Pishón” esimdi ittiń atyp óltirilgeni týraly aqparat taraǵan edi.
Atyraý oblysynyń ákimi Serik Shápkenov ittiń ólimine bailanysty arnaiy tekseris júrgizilip jatqanyn málimdedi.
Ákim bul jaǵdai týraly BAQ betterinen bilgenin atap ótti.
“Bul jaǵdai Mahambet aýdanynyń Sarytoǵai aýylynda oryn alǵan. Sý tasqyny kezinde halyqqa kómektesken “Pishón” esimdi it áleýmettik jelilerde tanymal boldy. Alaida 28 qarasha kúni aýyl turǵyny buralqy itterdiń úiine kirýine kedergi jasap jatqany týraly shaǵym túsirgen. Osyǵan bailanysty mamandar itterdi ýaqytsha uiyqtatýǵa arnalǵan dárini paidalanǵan. Keiinirek Jaiyq ózeniniń jaǵasynan “Pishón” atty ittiń óleksesi tabyldy”, — dedi ol.
Ákimniń aitýynsha, buralqy itterdi aýlaý zańǵa sáikes júrgiziledi. Agressivti itter iesiz bolǵan jaǵdaida óltiriledi, al basqalary zararsyzdandyrylyp, qaitadan iesine qaitady deidi. Al sońǵy oqiǵaǵa bailanysty dereý tekserý jumysy uiymdastyrylǵan.
“Atalǵan oqiǵa boiynsha arnaiy tekserý júrip jatyr. Qorytyndysy shyqqan soń, qosymsha aqparat beriledi”, — dep qosty oblys ákimi.
