Tashkenttiń Ortalyq kórme zalynda qazaq sýretshisiniń kórmesi ótti
Ózbekstan Respýblikasynyń astanasy Tashkent qalasyndaǵy Ortalyq kórme zalynda belgili sýretshi, QR Mádeniet qairatkeri Batýhan Baimenniń «Nomad's» atty jeke kórmesi ótti! Kórmeniń negizgi maqsaty – eki baýyrlas elder arasyndaǵy mádeni bailanysty nyǵaitý, sondai-aq kóshpendiler tarihynan, túrkiler rýhynan syr shertip, rýhani áser etý.
Ózbekstan elinde tuńǵysh ret jeke kórmesi ótip jatqan qazaq sýretshisiniń týyndylaryn tamashalaýǵa kelgen jurttyń qarasy qalyń. Kórmeniń tusaýkeserine Ózbekstan Sýretshiler Akademiiasynyń tóraǵasy Akmal Nýridinov, Ózbekstannyń Halyq sýretshisi Lekim Ibragimov syndy esimderi alty alashqa tanymal qyl qalam sheberleri qatysty. Sondai-aq, Qazaqstan Sýretshiler Odaǵynyń tóraǵasy Ómirbek Jubaniiazov, QR Memlekettik syilyǵynyń iegeri, sýretshi Nasyr Rústemov, Túrkistan oblysy Sýretshiler Odaǵynyń tóraǵasy Nurlan Shilibaev, Túrkistan oblystyq Kórkemsýret galereiasynyń direktory Ainabek Ospanov syndy óner maitalmandary men ónersúier qaýym ókilderi keldi.
1500 sharshy metrlik zalda sýretshiniń 150-ge jýyq týyndysy qoiylǵan. Ereksheligi – grafikalar úlken kólemde salynǵan. Bul linograviýra salasyndaǵy tyń jańalyqtyń biri deýge bolady. Kórmede sýretshiniń "Aýylym altyn besigim", "Abylai hannyń túsi", "Kóshpendiler", "Túrkiler" jáne Abai men Shyńǵys Aitmatovtyń shyǵarmalaryna toptama syndy birneshe serialar toptastyrylǵan.
Tashkent qalasynyń Ortalyq kórme zalynda ótken sharada sýretshi Batýhan Baimen Ózbekstan Sýretshiler Akademiiasynyń «Baýyrlas elder arasyndaǵy dostyqty nyǵaitqany úshin», Túrkistan oblystyq Qurmet uiymynyń medaldarymen marapattaldy. Atalǵan kórme Tashkent qalasynda 27 qyrkúiekte deiin jalǵasatyn bolady.
