Ózbekstan prezidenti Shavkat Mirziioev Tashkent oblysynda salynatyn jańa halyqaralyq áýejai jobasymen tanysyp, onyń qurylysynyń resmi bastalýyna arnalǵan saltanatty rásimge qatysty. Bul týraly Prezidenttiń baspasóz qyzmeti habarlady, dep habarlaidy Dalanews.kz.
Tashkenttiń qarqyndy damýy men álemge ashyq saiasattyń nátijesinde elge keletin týrister men investorlar sany edáýir artqan. Eger buǵan deiin sheteldik týrister sany 3 million bolsa, búginde ol 10 millionǵa jetip, 2030 jylǵa qarai 15 millionǵa deiin kóbeiedi dep kútilýde.
Kórshi eldermen tatý kórshilik qatynastar men shekaralardyń ashylýy aimaq ishinde erkin qatynaýǵa múmkindik bergen. Memleket basshysynyń bastamasymen salynyp jatqan Jańa Tashkent qalasy qolaily ornalasýy, investitsiialyq tartymdylyǵy jáne jaily ómir súrý jaǵdaiymen eldiń eń belsendi ortalyqtarynyń birine ainalmaq.
Salada básekelestik ortanyń qalyptasýy nátijesinde 15 jańa áýe kompaniiasy ashylyp, ushaqtar parki 26-dan 105-ke deiin ulǵaiǵan. Qazir 51 sheteldik áýe kompaniiasy - Saýd Arabiiasy, BAÁ, Katar, Ońtústik Koreia, Qytai, Úndistan, Malaiziia, Túrkiia, Resei, Polsha jáne basqa elderden - Ózbekstanǵa turaqty reister oryndaidy.
Mirziioevtiń aitýynsha, aldaǵy bes jylda ushaqtar sany 180-ge, baǵyttar sany 230-ǵa jetip, jylyna 200 myń reis oryndalmaq.
Jańa áýejaidyń erekshelikteri
Sońǵy segiz jylda Tashkentke keletin jolaýshylar sany úsh esege ósip, jylyna 9 million adamǵa jetti. 2040 jylǵa qarai bul kórsetkish 24 millionǵa deiin kóteriledi dep boljanýda. Al qazirgi áýejai qalanyń ishinde ornalasqandyqtan keńeitý múmkindigi joq.
Sondyqtan halyqaralyq sarapshylar men jurtshylyqtyń usynystaryn eskere otyryp, Ýrtachirchik jáne Qýiichirchik aýdandarynyń aýmaǵynda, 1 300 gektar jerge jańa halyqaralyq áýejai salý týraly sheshim qabyldandy.
Jobany Vision Invest (Saýd Arabiiasy), Sojitz (Japoniia) jáne Incheon (Ońtústik Koreia) kompaniialary birlesip júzege asyrady. Tórt kezeńnen turatyn bul jobanyń alǵashqy bóligine 2,5 mlrd dollar jumsalady.
Áýejai iske qosylǵan soń jylyna 20 million jolaýshyny jáne 129 myń tonna júkti qabyldai alady. Saǵatyna 30 ushaqtyń ushyp-qonýyna múmkindik týady, 14 teleskopiialyq trap, 62 ushaqqa arnalǵan turaq alańy qarastyrylǵan.
