وزبەكستان پرەزيدەنتى شاۆكات ميرزيويەۆ تاشكەنت وبلىسىندا سالىناتىن جاڭا حالىقارالىق اۋەجاي جوباسىمەن تانىسىپ، ونىڭ قۇرىلىسىنىڭ رەسمي باستالۋىنا ارنالعان سالتاناتتى راسىمگە قاتىستى. بۇل تۋرالى پرەزيدەنتتىڭ باسپا ءسوز قىزمەتى حابارلادى، دەپ حابارلايدى Dalanews.kz.
تاشكەنتتىڭ قارقىندى دامۋى مەن الەمگە اشىق ساياساتتىڭ ناتيجەسىندە ەلگە كەلەتىن تۋريستەر مەن ينۆەستورلار سانى ەداۋىر ارتقان. ەگەر بۇعان دەيىن شەتەلدىك تۋريستەر سانى 3 ميلليون بولسا، بۇگىندە ول 10 ميلليونعا جەتىپ، 2030 جىلعا قاراي 15 ميلليونعا دەيىن كوبەيەدى دەپ كۇتىلۋدە.
كورشى ەلدەرمەن تاتۋ كورشىلىك قاتىناستار مەن شەكارالاردىڭ اشىلۋى ايماق ىشىندە ەركىن قاتىناۋعا مۇمكىندىك بەرگەن. مەملەكەت باسشىسىنىڭ باستاماسىمەن سالىنىپ جاتقان جاڭا تاشكەنت قالاسى قولايلى ورنالاسۋى، ينۆەستيسيالىق تارتىمدىلىعى جانە جايلى ءومىر ءسۇرۋ جاعدايىمەن ەلدىڭ ەڭ بەلسەندى ورتالىقتارىنىڭ بىرىنە اينالماق.
سالادا باسەكەلەستىك ورتانىڭ قالىپتاسۋى ناتيجەسىندە 15 جاڭا اۋە كومپانياسى اشىلىپ، ۇشاقتار پاركى 26-دان 105-كە دەيىن ۇلعايعان. ءقازىر 51 شەتەلدىك اۋە كومپانياسى - ساۋد ارابياسى، ءباا، كاتار، وڭتۇستىك كورەيا، جۇڭگو، ءۇندىستان، مالايزيا، تۇركيا، رەسەي، پولشا جانە باسقا ەلدەردەن - وزبەكستانعا تۇراقتى رەيستەر ورىندايدى.
ميرزيويەۆتىڭ ايتۋىنشا، الداعى بەس جىلدا ۇشاقتار سانى 180-گە، باعىتتار سانى 230-عا جەتىپ، جىلىنا 200 مىڭ رەيس ورىندالماق.
جاڭا اۋەجايدىڭ ەرەكشەلىكتەرى
سوڭعى سەگىز جىلدا تاشكەنتكە كەلەتىن جولاۋشىلار سانى ءۇش ەسەگە ءوسىپ، جىلىنا 9 ميلليون ادامعا جەتتى. 2040 جىلعا قاراي بۇل كورسەتكىش 24 ميلليونعا دەيىن كوتەرىلەدى دەپ بولجانۋدا. ال قازىرگى اۋەجاي قالانىڭ ىشىندە ورنالاسقاندىقتان كەڭەيتۋ مۇمكىندىگى جوق.
سوندىقتان حالىقارالىق ساراپشىلار مەن جۇرتشىلىقتىڭ ۇسىنىستارىن ەسكەرە وتىرىپ، ۋرتاچيرچيك جانە قۋييچيرچيك اۋداندارىنىڭ اۋماعىندا، 1 300 گەكتار جەرگە جاڭا حالىقارالىق اۋەجاي سالۋ تۋرالى شەشىم قابىلداندى.
جوبانى Vision Invest (ساۋد ارابياسى)، Sojitz (جاپونيا) جانە Incheon (وڭتۇستىك كورەيا) كومپانيالارى بىرلەسىپ جۇزەگە اسىرادى. ءتورت كەزەڭنەن تۇراتىن بۇل جوبانىڭ العاشقى بولىگىنە 2،5 ملرد دوللار جۇمسالادى.
اۋەجاي ىسكە قوسىلعان سوڭ جىلىنا 20 ميلليون جولاۋشىنى جانە 129 مىڭ توننا جۇكتى قابىلداي الادى. ساعاتىنا 30 ۇشاقتىڭ ۇشىپ-قونۋىنا مۇمكىندىك تۋادى، 14 تەلەسكوپيالىق تراپ، 62 ۇشاققا ارنالعان تۇراق الاڭى قاراستىرىلعان.
