Básekelestikti qorǵaý jáne damytý agenttigi dárilik zattar men medısınalyq buıymdardy ınspeksıalaý naryǵyndaǵy básekelestik jaǵdaıyna júrgizilgen taldaýdyń qorytyndysyn jarıalady, dep habarlaıdy Dalanews.kz.
Taldaý nátıjesinde dárilik zattar men medısınalyq buıymdardy saraptaý jónindegi memlekettik saraptamalyq uıym – «Dárilik zattar men medısınalyq buıymdardy saraptaý ulttyq ortalyǵy» SHJQ RMK (DZjMBSUO) monopolıalyq jaǵdaıǵa ıe ekeni anyqtaldy. Bul ortalyq eldegi osyndaı qyzmetterdi kórsetetin jalǵyz uıymy jáne naryqtyń 100% ıe.
Taldaý barysynda ınspeksıalaý qyzmetterine arnalǵan tarıfter ortalyqtyń ózi tarapynan derbes túrde bekitiletini belgili boldy. Bul jaǵdaı tarıftik saıasattyń obektıvtiligine kásipkerler tarapynan kúmán týǵyzyp, baǵalardyń negizsiz qymbattaýyna alyp kelý qaýpin týdyrady.
"Máselen, júrgizilgen taldaý nátıjesinde bir ınspeksıalyq qyzmet tarıfiniń alty esege óskeni anyqtaldy. Bul óz kezeginde dárilik zattar men medısınalyq buıymdardyń túpkilikti baǵasyna áser etedi. Sebebi óndirýshiler men jetkizýshiler bul ilespe shyǵyndardy shekti baǵalarǵa engizedi, al bul baǵalardy keıin memleket pen halyq tóleıdi. Osyǵan baılanysty, dárilik zattar men medısınalyq buıymdardyń baǵasyn tómendetý jáne halyq úshin qoljetimdi etý maqsatynda, monopolıaǵa qarsy organ ortalyqtyń ústem jaǵdaıdy teris paıdalanýyna qatysty qyzmetine tekserý júrgizedi", delingen BQDA habarlamasynda.
Sonymen qatar, ınspeksıalyq qyzmetterdi memlekettik monopolıaǵa jatqyzý máselesi qaralatyn bolady. Bul bolashaqta atalǵan qyzmetterge tarıfterdi retteýge múmkindik beredi.
