Jýrnalist Mihail Kozachkovtyń málimetinshe, Tarazda Baýyrjan Momyshuly atyndaǵy "Jeńis" saiabaǵyna qatysty jer daýy birneshe jyldan beri sheshilmei keledi. Keiingi ýaqytta jaǵdai ýshyǵyp, attraktsiondardyń elektr qýatyn ajyratýǵa politsiia qyzmetkerleri de tartylǵan. Onyń aitýynsha, mundai áreketke negiz bolatyn sot sheshimi joq, dep habarlaidy dalanews.kz.
Kozachkovtyń jazýynsha, 2018 jyly aýmaǵy 15 gektardan asatyn jer telimi qalany kógaldandyrý jáne abattandyrýmen ainalysatyn "Jasyl-El-Taraz" JShS-niń jarǵylyq kapitalyna berilgen. Keiin ákimdik saiabaqty damytý úshin jeke investor tartýǵa sheshim qabyldap, "TANDAMALY" jeke kásipkerligimen jerdi 15 jylǵa ýaqytsha paidalaný týraly kelisim jasaǵan.
"Kásipker saiabaqty damytýǵa 180 million teńgeden astam qarjy salyp, attraktsiondar ornatty", – dep jazdy jýrnalist.
Alaida biraz ýaqyttan keiin ákimdik sheshimin ózgertip, jerdi qaitadan memleket menshigine qaitarǵan. Sonyń saldarynan investordyń quqyqtyq jaǵdaiy belgisiz kúide qalyp, ol memlekettik organdarmen hat almasyp, máseleni quqyqtyq jolmen sheshýge tyrysqan.
Jýrnalistiń aitýynsha, sol kezde-aq qala prokýratýrasy ákimdikke usynys engizip, "TANDAMALY" kásipkerligimen jasalǵan kelisimdi tek sot tártibimen buzýǵa bolatynyn kórsetken.
"Budan bólek, qadaǵalaý organy osy jaǵdaiǵa jol bergen memlekettik qyzmetkerlerdi jaýapkershilikke tartýdy talap etti", – deidi Mihail Kozachkov.
Onyń sózinshe, sol kezdegi biznes-ombýdsmen Rýstam Júrsinov te kásipkerdiń quqyǵyn qorǵap, oblys jáne qala ákimderine arnaiy hat joldaǵan.
"Attraktsiondardyń jumysyn toqtatýǵa eshqandai zańdy negiz bolǵan joq. Sol sebepti olar osy ýaqytqa deiin jumysyn jalǵastyryp keldi", – dep jazdy jýrnalist.
Kozachkovtyń málimetinshe, biyl ǵana "Jambyl elektr jelileri" JShS-niń kómegimen attraktsiondardyń jumysy toqtatylǵan.
"Jaldaýshyǵa elektr qýatyn óshirý týraly habarlama jiberildi. Al kelisimshartqa sáikes mundai shara tek bereshek bolǵan jaǵdaida ǵana qoldanylýy tiis edi", – deidi ol.
Onyń aitýynsha, keiin saiabaq aýmaǵynan transformator, odan soń elektr generatory shyǵarylǵan.
"Tarazda jumys istep turǵan kásiporynnyń múlkin politsiia qyzmetkerlerin tarta otyryp alyp qoiýǵa bola ma?" – degen suraq qoiady jýrnalist.
Osy oqiǵadan keiin "TANDAMALY" jeke kásipkerligi "Jambyl elektr jelileri" JShS-ne qarsy sotqa talap aryz berip, kompaniianyń áreketin zańsyz dep tanýdy suraǵan. Sonymen birge kásipker Bas prokýratýraǵa aryz joldap, ákimdik pen politsiia qyzmetkerleriniń áreketteriniń zańdylyǵyn tekserýdi talap etken.
"Eger tekserý barysynda olardyń qyzmettik ókilettigin asyra paidalanǵany anyqtalsa, ne bolady?" – dep jazdy Mihail Kozachkov.
Jýrnalist taǵy bir jaitqa nazar aýdarǵan. Onyń aitýynsha, eger memlekettik organdardyń maqsaty saiabaqtaǵy kommertsiialyq nysandardy alyp tastaý bolsa, onda nege attraktsiondardyń janynda jumys istep turǵan meiramhanalarǵa qatysty eshqandai shara qabyldanbai otyrǵany túsiniksiz.
"Tarazda bul qoǵamdyq tamaqtaný oryndarynyń qala ákimi Baqytjan Orynbekovtiń týystaryna tiesili ekenin kópshilik jaqsy biledi. Álde balalar attraktsiondarynyń shýy solardyń tynyshtyǵyna kedergi keltirip júr me?" – dep túiindeidi jýrnalist.
Aita keteiik, bul málimetter Mihail Kozachkovtyń Telegram-arnasynda jariialanǵan. Qazirgi ýaqytta ákimdik pen quqyq qorǵaý organdary atalǵan jaǵdaiǵa qatysty resmi túsinikteme bergen joq.
