Tarazda polıseıler júrgizgen jedel-izdestirý is-sharalary barysynda esirtkiniń zańsyz aınalymyna qatysy bar degen kúdikpen 43 jastaǵy azamatty ustady, dep habarlaıdy Dalanews.kz.
Jeke tintý kezinde odan ózine tán ıisi bar aq tústi untaq zat salynǵan zıp-paketter tabylyp, tárkilendi. Keıin onyń turǵylyqty jerinde júrgizilgen tintý barysynda jatyn bólmesinen de osyndaı oramalar, elektrondy tarazy jáne esirtkini ólshep, oraýǵa arnalǵan ózge de quraldar alyndy.
Aldyn ala málimetterge sáıkes, kúdikti áleýmettik jeliler arqyly jumys týraly habarlandyrýdy kórip, keıin esirtki zattaryn taratýǵa baılanysty zańsyz qyzmetpen aınalysýǵa kelisken. Ol jasyryn oryndardan esirtkini alyp, ony bólshektep, Almaty men Taraz qalalary aýmaǵynda jasyryn oryndarǵa qaldyryp júrgen.
Jalpy alǵanda, ustalǵan kúdiktiden 122 gram Álfa-PVP sıntetıkalyq esirtkisi tárkilendi.
Atalǵan derek boıynsha sotqa deıingi tergeý amaldary bastaldy. Kúdikti ýaqytsha ustaý ızolátoryna qamaldy.
Qazirgi ýaqytta oqıǵanyń barlyq mán-jaıyn jáne qylmysqa qatysy bolýy múmkin ózge tulǵalardy anyqtaýǵa baǵyttalǵan qajetti tergeý amaldary júrgizilip jatyr.
