تارازدا پوليسەيلەر جۇرگىزگەن جەدەل-ىزدەستىرۋ ءىس-شارالارى بارىسىندا ەسىرتكىنىڭ زاڭسىز اينالىمىنا قاتىسى بار دەگەن كۇدىكپەن 43 جاستاعى ازاماتتى ۇستادى، دەپ حابارلايدى Dalanews.kz.
جەكە ءتىنتۋ كەزىندە ودان وزىنە ءتان ءيىسى بار اق ءتۇستى ۇنتاق زات سالىنعان زيپ-پاكەتتەر تابىلىپ، تاركىلەندى. كەيىن ونىڭ تۇرعىلىقتى جەرىندە جۇرگىزىلگەن ءتىنتۋ بارىسىندا جاتىن بولمەسىنەن دە وسىنداي ورامالار، ەلەكتروندى تارازى جانە ەسىرتكىنى ولشەپ، وراۋعا ارنالعان وزگە دە قۇرالدار الىندى.
الدىن الا مالىمەتتەرگە سايكەس، كۇدىكتى الەۋمەتتىك جەلىلەر ارقىلى جۇمىس تۋرالى حابارلاندىرۋدى كورىپ، كەيىن ەسىرتكى زاتتارىن تاراتۋعا بايلانىستى زاڭسىز قىزمەتپەن اينالىسۋعا كەلىسكەن. ول جاسىرىن ورىنداردان ەسىرتكىنى الىپ، ونى بولشەكتەپ، الماتى مەن تاراز قالالارى اۋماعىندا جاسىرىن ورىندارعا قالدىرىپ جۇرگەن.
جالپى العاندا، ۇستالعان كۇدىكتىدەن 122 گرامم الفا-PVP سينتەتيكالىق ەسىرتكىسى تاركىلەندى.
اتالعان دەرەك بويىنشا سوتقا دەيىنگى تەرگەۋ امالدارى باستالدى. كۇدىكتى ۋاقىتشا ۇستاۋ يزولياتورىنا قامالدى.
قازىرگى ۋاقىتتا وقيعانىڭ بارلىق ءمان-جايىن جانە قىلمىسقا قاتىسى بولۋى مۇمكىن وزگە تۇلعالاردى انىقتاۋعا باعىتتالعان قاجەتتى تەرگەۋ امالدارى جۇرگىزىلىپ جاتىر.
